1 Korintos 2 - Saaho Cusub Cahde

Masiix masqalak takarimem warroyshaanam

¹ Yi saculo, anu gantah sinalle emeete gedda, waanit dhic hido kasah Yallih mashthir sinah warisho maamaatiyo.

² Yeesus Masiix kee masqalakke takarime kaako bextih sinlih aniyuk akih inkim aarhigemko abayshe.

³ Anu lel rukta, mashshi kee mango arharhoolih kinni sinlih iniyom,

⁴ yi waani kee yi warroyishnan lel waanit cijaajinna kee kasah tekkem akkekkah, Ufaye kee xayla caddoyishsham kuuk tine.

⁵ Amayim lel, sin imaan xiyaw kasadde akkekkah Yallih xayladde cikittem takko ciloh kinni.

Kas Yallih Ufayeko

⁶ Hamme-le marahi fanadde kasti zacabah waanishna, tamaa nanu waanishnam laakin ta waqhtih kas hido lel alayi tane ta waqhtih reezonhi kas maki.

⁷ Nanu waanishnam, tamaa dherh waqhtih basolle Yalli ni nabneh yisqirribe yine mashthir kee sucuteh yine Yallih kas kinni.

⁸ Ta waqhtih reezonko tayim walaa inketti mafhaminna, yifhimiinih yakkeedo, nabnet Maddara masqalakke takareenih anniye mirhaarhinnooni.

⁹ Amaymih lel tayim tunkuttubeh tane: “Inti ablinnixem, cokka aabbinnixem, xiyawti afcaado axeesebinnixem, Yalli tamaa kixin marah yisqirribeh yane.”

¹⁰ Yalli tayim Ufayi araxah ni yuybulluweh yane. Ufayi lel ummannim Yallih adda raacekkah meceetih idhdhita.

¹¹ Xiyawti addadde yane ufayeko bextih, amaa xiyawtih xisaab miyatti yaarhige? Amayim balih lel Yallih Ufayeko bextih Yallih xisaab walaa inketti miyaarhige.

¹² Kado, nanu Yalli limo hinnim noh yoxoyem naarhago ciloh, Yallaako kin Ufaye kinni kabbatneh nanem kibah ta caalamti ufaye maki.

¹³ Tayimhi zacabah waanishnam, xiyaw waanih araxah nudruse kasah maki. Ufayim Ufayi adde yane xiyawah caddoyishnam laakin, Ufayi yuyduruse marih waanih kinni.

¹⁴ Ufayi adde anniinnixeti Yallih Ufayeko kinam kayyalle duudiino kinamhi sabbatah mikabbaata. Amayim lel Ufayi araxah tammirmirem kinamhi sabbatah lel usuk yafhamo mirhiica.

¹⁵ Ufayi adde yane xiyawti ummanim yamirmire, usuk laakin walaa inkettah miyammirmire.

¹⁶ “Maddara yaydaraso ciloh kaa xangaladde tanem yaarhige tiyah miyatti yane?” Nanu laakin Masiix xangal lino.