1 Korintos 16 - Saaho Cusub Cahde

Yerusaalemille geytima yaamine marah tekette solaadi

¹ Tamaa yinqiddise marah takke solaadi yayyaacinimhi zacabah; Galaatiyaati kanaayisih akah esxesseekah, atin gantah abanta.

² Amaa solaadi yayyaaciinim anu amiite geddadde yakkemko, umman baxuurooko afti maxadde, ummanti ishi-ishi dhicille, barhisheh oobishoo.

³ Anu amiite gedda lel, amaa sin muttuxuwa Yerusaalem gudduusoona tamaa atin doorten mara, caddosti jawawub alle oxoyeh ten dhirhiyo kiyo.

⁴ Anu adiyem farhshishshemko lel, usun yottaalih yadawna kinon.

Kallaaxi xagara

⁵ Makedooniyaako tillaabo kiyomhi sabbatah, Makedooniyaako tillaabak sarrah sinalle amaato kiyo.

⁶ Kallaaxeh alle adiinnanille yi sukuukuytoona ciloh, sinlih baxuurusam hido dhamxin waqhte tillaabisham takke.

⁷ Arax yadiye ekkeh bisa sin ablo mifarha. Yalli farhemko, sinlih baxuurusam kixiniyo.

⁸ Efesosulle aykee Bentheqostheeti cid fanah sugo kiyo.

⁹ Makko-le ciyyoh naba caraf yoh fakkiteh yane, yi didde kin mari laakin mangon.

¹⁰ Timoteyos sinalle amiitinnan gedda lel, yotta balih Maddari ciyyo aba tiya kinamhi sabbatah, mashshi hinnim sinlih akah sugaakah akko abanta.

¹¹ Amaydo, walaa inketti kaa ilaace wayoo. Amaa sacullih yamaato kaa ilaalak aniyomhi sabbatah, yottalle gaxo ciloh farhshishsham akah toxoynih, maaxiyodde kaa sukuukuwanta.

Abayshimat fawo

¹² Abolloos ni sacalhi zacabah yekkemko, amaa ni sacullih sinalle yamaato sirii ginah kaa dhaacime, kaa farhi makkinnamhi sabbatah laakin, kado sinalle amiituk miyane. Caashir geyinnan gedda lel sinalle yamaato kinni.

¹³ Himma-abitanta, imaanalle isbita, labha tika, isriya.

¹⁴ Abinnannim kaxanodde abanta.

¹⁵ Yi saculo, Istifaanos dik, Akhaayaati baarholle erherhih yeemene mara kinoonim kee sinni nabse yinqiddise marahi khidmah yoxoynim taarhigin.

¹⁶ Atin lel ta gina le mara kee inkoh nottaalih yakhdume mara kee xawala marah tam-azzazoona sin asuusak aniyo.

¹⁷ Istifaanos, Fortunaatos kee Akhaykos yemeetiinimih xedeneena kiyo. Amayim lel sin idhdha yekkiinih yok tunqusem yoh yiskmiliinimhi sabbatah kinni.

¹⁸ Sin ufaye kee yi ufaye yuscurufiinih kinon. Amaydo, atin ten taarhigiinim akah eedda.

Salaamta

¹⁹ Aasiyalle yane kanaayis salaamat sinak yarhxin. Akiila kee Biriskilla, tamaa ten caredde takatte kaniisat mari, Maddari migacalle mangum salaamat sinak yarhxin.

²⁰ Sacul inkoh salaamat sinak yarhxin. Atin lel tinqiddise fugtoh salaam sittiyak erhexa.

²¹ Ta salaamta, Bawlosuk anu inni gabah uktube tiya kinni.

²² Ni Maddara akxininnixeti yinniyemko, abaaro-le yakkoo. Ni Maddara, amo!

²³ Maddara kin Yeesus nicma sinlih takkoo.

²⁴ Yi kaxani inkoh Masiix kin Yeesus araxah sinlih yakkoo. Amin.