1 Korintos 15 - Saaho Cusub Cahde

Yeesus Rabaakohi ugut

¹ Kado lel yi saculo, tamaa anu sinalle warroyshe mece ware sin duhsuuso farhak aniyo. Amayim lel, tamaa kabbatteenih, alle soolteenih taniinim kinni.

² Tamaa anu sinalle warroysha waanittalle tisbitiinimko, gargeerimteenih tanin, akke wayemko sin imaan foyya kinni.

³ Tamaa anu kabbaatem ummanimko basolle sinalle tillaabisheh aniyo, tamaa Kutuub akah yarhxeekah lel, Masiix ni zambeh arhxuk rabeh,

⁴ yumuccugeh, Kutuub akah yarhxeekah lel maddaxit lellec rabaako uguteh,

⁵ Keefah yumbulluwe, sarrah lel lamman kee tamanah yumbulluwe.

⁶ Amaymik sarrah, koona boolko ziyaada saculuh inki geddalle yumbulluwe, tenko mango mari kaafa fanah yanin, gari laakin dhiineenih yanin.

⁷ Amaymik sarrah, Yacqoobuh yumbulluwe, sarrah lel inkoh fartottitih yumbulluwe.

⁸ Umman tenko sarrah lel, waqhte maleh yoobokeh higgidin yottah gantah yumbulluwe.

⁹ Anu umbuka fartottitko gaxa tiya kiyo, amaa Yallih kaniisa hadane tiya kiyomhi sabbatah lel, fartottah decsiimam yoh mimissila.

¹⁰ Yallih raxmah laakin anu kiyo tiya kiyo, kaa raxma lel foyya makkinna. Rummah, umman tenko ziyaada ukhdume, yottaalih tane Yallih raxmah kibah laakin yotta maki.

¹¹ Farheh yotta, hido tena yekkeh, taginah kinni warroyishnam, atin lel taginah kinni teemeniinim.

Rabaakohi ugut

¹² Masiix rabaako ugutem warroytemko, aaginah kinni sinko gari rabaakohi ugut miyane yarhxiinim?

¹³ Rabaakohi ugut anniye wayemko, amaydo Masiix gantah rabaako uguteh miyane.

¹⁴ Masiix rabaako uguteh anniye wayemko, amaydo ni warroyishnan foyya kinni, sin imaan lel foyya kinni.

¹⁵ Yalli Masiix rabaako ugusem warroyishnemih, zirabti shohoda nekke, rabe mara uguse wayem rumma yekkemko, Masiix gantah rabaako muugusinna.

¹⁶ Amayim lel rabe mari uguteenih akke wayenimko, Masiix gantah rabaako muugutinna macna kinni.

¹⁷ Masiix rabaako uguteh akke wayemko, sin imaan foyya kinni, kaddik lel sinni zambedde tanin.

¹⁸ Sarrah, tamaa Masiixih yeemeneh dhiine mari gantah yeleynih yanin.

¹⁹ Masiixidde lino cag ta udduuniyalle bisa yekkemko, umman maraako ziyaada akah xazzanowan mara kino.

²⁰ Masiix laakin rummah rabaako ugute, taginah lel dhinko uguta marahi afti darotta yekke.

²¹ Amaydo, tamaa rabi inki xiyawtih araxah akah temeeteekah, rabaako ugutaanam lel inki xiyawti araxah temeete.

²² Ummanti Adam araxah akah rabeekah, ummanti Masiix araxah yane mara yakkoona kinon.

²³ Laakin ummanti ishi-ishi rigah, erherhih Yeesus ugute, sarrah kaa gaxnanalle tamaa Masiix mari ugutoona kinon.

²⁴ Masiix lel umman nizaam, umman reeza kee xayla yiscireh, amaa nigsinna Abba kin Yallah baaha gedda, abayshima takko kinni.

²⁵ Amayim lel ishi nacabtoolit inkoh ishi ibahi geridde hayandah yangaso kaalle tanemhi sabbatah kinni.

²⁶ Abayshimat cangi yamsaccaro leya lel rabi kinni.

²⁷ “Yalli umman tiya am-azzazah kaa ibahi geridde akah haye” yarhxiinim tunkuttubeh tane. “Ummannim akah tim-izzize” yarhxiinim tunkuttubeh taneya, amaa akah tam-azzazo akko abe tiya tablem makinam mudhdhug kinni.

²⁸ Ummanim akah tim-izzizemko sarrah, Yalli ummannim kee ummanidde yakko ciloh, Barhi isheh ummannim kayyah akah tam-izzizeekah abe tiyah yam-azzazo kinni.

²⁹ Akke wayemko, rabe tiyahi idhdhadde yanthimmiqhe mari ayim kinni abak yaniinim? Inkinnah rabe mari ugute waynimko, aymih kinni ten idhdhadde yanthimmiqhiinim?

³⁰ Nanu aymih kinni umman saaca gidcatadde saynam?

³¹ Yi saculo, anu maaxi yamaato rabo farham, sin sabbatah ni Maddara kin Yeesus Masiix araxah liyo cafad kinam, sinah caddoyisha.

³² Efesosulle alluulaalih engeecem, xiyaw cagah bisa yakkeedo, yi kasbi ayim kinni? Rabe mari uguteenih akke wayemko laakin, tamaa: “Beera rabno kinok, benneh naacabo” yerhxiinim balih kinni.

³³ Midoolabimina: “Uma zoobatti mece adabe caynisha”

³⁴ Missilam kinnik sinni afcaadolle gaxanta, zambe lel maabina. Tayim lel gari Yallih idhdhaaget maloonimhi sabbatah kinni. Tayim lel xoolashshittoona sinak arhxem kinni.

Rabaako ugute nabse

³⁵ Xiyawko gari: “Rabe mari aaginah kinni ugutaanam? Aagina le nabseelih kinni yamiitiinim?” yarhxoona kinon.

³⁶ Ko duuda! Atu tazriyem rabe wayemko ufaye mibaaha.

³⁷ Atu tazriyem lel, tamaa yabqalo-le nabse akkekkah, sinraa hido aki ilaw zara bisa kinni.

³⁸ Yalli lel isheh farhe nabse akah yaxaye, umman caynah zarattoh lel kaa-kaa nabse akah yaxaye.

³⁹ Xiyaw xazotta ulah, bahayimti xazotta ulah, kimbirti xazotta ulah, caasat xazotta lel ulah kibah, umman xazotta lem maki.

⁴⁰ Carshi nabsi yane, baarhot nabsi yane, yakko kibah carshi-tiyahi nabne akettö kinni, baarhottiyahi nabne lel akettö kinni.

⁴¹ Wuli ayrot nabne tane, aki alsi nabne lel tane, aki xutukti nabne lel tane; nabneh xutukti xutuktaako barhsima.

⁴² Amaydo, rabe marahi ugut amaa ginah kinni. Yimzirriyeti yalaye, uguteti lel miyalaye.

⁴³ Carhuumussedde yamzirriye, nabneelih uguta. Tantodde yamzirriye, xaylaalih uguta.

⁴⁴ Thabiicat nabsek yamzirriye, ufaye kin nabsek uguta. Thabiicat nabsi yinniyemko, ufaye kin nabsi lel yane.

⁴⁵ “Afti xiyawti Adam, aniina le tiya yekke” yarhxiinim tunkuttubeh tane. Sarroorimat Adam lel aniina yaxaye ufaye yekke.

⁴⁶ Laakin erherhih tamaa thabiicat tiya, sarrah lel ufayi tiya kibah, amaa ufayi-ti erherhadde maki.

⁴⁷ Erherh xiyawti baarhooko kinnih, baarhottiya kinni, malammit xiyawti lel carsheeko kinni.

⁴⁸ Baarhot mari tamaa baarhottiya balih kinon, tamaa carshi-mari lel carshi-tiya balih kinon.

⁴⁹ Nanu tamaa baarhottiyahi misle akah beyneekah, carshi-tiyahi misle gantah beyno kino.

Sirre kee nasre

⁵⁰ Yi saculo, anu sinah warishak aniyo: xazotta kee biilo, Yallih nigsinna yawrashoona akah taaneeniikah, yalayeti alayinnixe tiya yawrasho mirhiica.

⁵¹ Taykinna! Mashthir sinah warishak aniyo. Nanu inkoh dhinno makino, inkoh laakin nambaddalo kino.

⁵² Toye takko lem lel abayshimat thurumba andhaxta gedda, inki geddalle, inti xaf-tarhxeh sam-tarhxem hidhdhalle kinni. Amaa thurumba andhaxta gedda, rabtem alayinnixe mara balih ugutoona kinon, nanu lel nambaddalo kino.

⁵³ Amayim lel amaa yalaye nabsi alayinnixe nabse hashshiito, raba nabsi lel rabinnixe nabse hashshiito alle tanemhi sabbatah kinni.

⁵⁴ Yalayeti alayinnixem hashshiitah, rabati rabinnixem hashshiitta gedda ta tunkuttubeh tanem takko kinni: “Rabi nasredde tumundhuce”

⁵⁵ “Ko raba, ku nasri awla yane? Ko raba, ku muduma awla tane?”

⁵⁶ Rabit muduma zambe kinni, zambi xayli lel sercat kinni.

⁵⁷ Laakin, ni Maddara kin Yeesus Masiix araxah nasre noh yoxoye Yallah xamde takkoo!

⁵⁸ Amaydo, yinkixxine yi saculo, qath-erhexa, inkille isbita, Maddarah arhxitin abtan xawal foyya makinam teerhegiinih, umman gedda Maddari ciyyodde esseesanta.