1 Korintos 14 - Saaho Cusub Cahde

Nabii balih waanishaanam kee barhsime afofuh waanishaanam

¹ Kaxano katayteenih, Ufayi muttuxuwa, fertoh lel nabii balih waanishaanam hambereeroolih duumutanta.

² Aki afah waanishati aalih waanisham xiyaw akkekkah Yalla kinamhi sabbatah, kaa yafhimeti miyane, usuk laakin Ufayeh mashthir kinam kinni waanisham.

³ Wuli gabooko lel, tamaa nabii balih waanishati xiyaa carishsham, xiyaa aydukumussam kee xiyaa agiirishsham kinni waanisham.

⁴ Tamaa aki afah waanishati ishe carisha, nabii balih waanishati laakin kaniisa carisha.

⁵ Kado, inkoh aki afofuh waanishshoona, fertoh lel nabii balih waanishshoona sinak farha. Kaniisa carto ciloh, amaa aki afofuh waanisham ayfissire wayemko, amaa aki afofuh waanisha tiyaako, nabii balih waanishati naba.

⁶ Kado, yi saculo, wuli waxye, hido irhga, hido nabii balih waanishaanam, hido darse sinah baaho akkekkah aki afofuh waanishak sinalle emeetemko, aaginah sin amfaco kiyo?

⁷ Tamaa ufaye hin, machambara hido kiraar balih yane nuwaa, barhsime muziqqat dhaw aalle wayemko, awlih nuwatta kinam aaginah yamadhdhago kinni?

⁸ Thurumba amidhdhiginnixe dhaw toshshoobbemko, dhibah ugutto lem miya kinni?

⁹ Amayim balih, atin, tamaa waanishshan waani amidhdhiginnixem tekkemko, terhxiinim aaginah tamadhdhago kinni? Xaaxattaalih waanishe mara balih kinni takkiinim.

¹⁰ Caalamalle shakke hinnim mango caynah waani tane, macna hin waani lel mitane.

¹¹ Amaydo, anu tamaa waanih macna sorhemko, tamaa waanisha tiyalle anu godobotta kiyo, usuk lel yottalle godobotta kinni.

¹² Amayim balih lel atin, Ufayi muttuxuwah hambereera mara tekkiinik sarrah, kaniisa carishsha muttuxuwa wagiyanta.

¹³ Amaydo, aki afah waanishati amayim akah yayfissire dhic yaallo dhaaco aboo.

¹⁴ Aki afah dhaaco abemko, yi ufayi dhaaco aba, yi xangal laakin fire male.

¹⁵ Ayim abo yolle tane? Inni ufayeh dhaaco abo kiyo, laakin inni xangalah gantah dhaaco abo kiyo. Inni ufayeh fayla qannisho kiyo, laakin inni xangalah gantah fayla qannisho kiyo.

¹⁶ Akke wayemko, atu ishi ufayeh cawwatoyshitta gedda, amaa makaanolle yane godobotti, atu cawwatoyshittem aaginah yeerhegeh Amin yarhxo dhiica?

¹⁷ Atu meceetih cawwatoyshitak tanniye, aketti laakin careh miyane.

¹⁸ Umbuka sinko ziyaada aki afofuh waanisho dhiicamah Yallah xamde addabbe.

¹⁹ Yakko kibah, galle aydaraso ciloh, kaniisadde laakin, aki afah cadadamko, inni xangalah koona waanitta waanisham farha.

²⁰ Yi saculo, sinni niyah irro makkina. Umaanih zabul tika, sinni niyah laakin hamme-le mara tika.

²¹ Sercatadde: “‘Ta xiyawlih aki af kee godobot wagubuh tenlih waanisho kiyo, amayim kinni hanuk yi yaabboona makinooni’ yarhxe Maddari” yarhxiinim tunkuttubeh tane.

²² Amaydo, aki afofuh waanishaanam yaamine marah akkekkah, aamininnixe marah ishaara kinni, nabii balih waanishaanam lel aamininnixe marah akkekkah yaamine marah ishaara kinni.

²³ Amaa kaniisadde inkoh yakattiinih inkoh lel aki afofuh waanishak, godobo hido aamininnixe mari orobeenimko, “Ta mari yicbide mara kinon” yarhxoona makinooni?

²⁴ Inkoh nabii balih waanishak, aamininnixeti hido godobotti orobemko laakin, inkoh kaa yashshiminin, umman tenah lel yamfirride.

²⁵ Kaa afcaadodde sucutteh tanem tawce: “Rummah sin fanadde Yalli yane” yerhxeh lel kumeyaako Yallah yacbado kinni.

Araxah aban cibaada

²⁶ Amaydo, yi saculo ayim abno haye? Takattin gedda, ummanti ishi-ishi faylat mazmuur, darse, waxye, aki af, hido tafsiir leya. Tayim inkoh kaniisat carsah abanta.

²⁷ Akkinnanti aki afah waanishemko, lallammaah, yemmengiinimko lel adoddoxuh ibre-ibreh waanishoonaa, inketti lel yayfassaroo.

²⁸ Yayfissireti anniye wayemko laakin, kaniisadde sik-yerhxeh ishe kee Yallaalih waanishoo.

²⁹ Lamma hido adooxa nabii waanishoonaa, gari lel usun yerhxiinim yamarmaroonaa.

³⁰ Tamaa defeyeh yane maraako inkettalle waxyi alle yemeetemko, amaa aftiti sik-yarhxoo.

³¹ Inkoh yadrasoona kee inkoh aydukumusnan geyoona ciloh, inkoh inkeekettah nabii balih waanishshoona dhictan.

³² Nobowat ufayit nobowah yam-izzizin.

³³ Amayim lel Yalli, maaxiyoh Yalla kibah amlolokkaati tiya maki. Umbuka yinqiddise marahi kanaayis balih,

³⁴ sayyo kanaayisidde sik-yarhxoonaa. Tenah waanishoona akah mitansimmixemhi sabbatah, tamaa sercat akah yarhxeekah, yam-azzazoonaa.

³⁵ Usun yadrasoona farhaanam tinniyemko, carelle sinni baacil esseritoonaa. Amayim lel numa kaniisadde waanishsham xoola kinamhi sabbatah kinni.

³⁶ Hido Yallih waanitta sinko kinni temeetem? Hido lel sina bisa kinni guftem?

³⁷ Akkinnanti nabii kinam, hido Ufayi adde yanem ishe yakkaleya yinniyemko, ta anu sinalle aktubiyuk anem Maddari amre kinamah yaarhago kaalle tane.

³⁸ Tayim aarhige wayemko, kaa taarhigem mitane.

³⁹ Amaydo, yi saculo, nabii balih waanishshoona hambereeroolih duumutanta, aki afofuh waanishaanam lel mikalitina.

⁴⁰ Ummannim laakin meceetih farhshiisha araxah takko alle tane.