1 Korintos 12 - Saaho Cusub Cahde

Ufayi muttuxuwa

¹ Kado, yi saculo, Ufayi muttuxuwah zacabah sodhdhoona sinak mifarha.

² Yallah aamine wayak tinin gedda, doolabimtaanah naxar hin asnaam fanah hido-hidoh aduuk tiniinim taarhigin.

³ Amaydo, Yallih Ufayeh waanishah: “Yeesus abaaro-le kinni” yarhxeti miyanem; amayim balih, Quddus kin Ufayi araxah akke wayemko: “Yeesus Maddara kinni” yarhxo dhiicati miyanem taarhagoona sinak farha.

⁴ Amaydo, barhsimte muttuxuwa tane, laakin Ufayi inketta kinni;

⁵ barhsime khidmam yane, Maddari laakin inketta kinni.

⁶ Umman caynah ciyyo tane, amayim umman tiyadde abtam laakin inki Yalla kinni.

⁷ Quddus kin Ufayi leyamhi caddos umman sinah yomxoyem, inkiddehi nafaacah kinni.

⁸ Wuli tiyah Ufayi araxah xikmat waani akah tamxaye, akettoh lel amaa Ufayi araxah irhgat waani akah tamxaye.

⁹ Akettoh amaa Ufayi araxah imaan akah yamxaye, wuliti lel amaa Ufayehi araxah urusnan muttuxuwa akah tamxaye.

¹⁰ Wuli tiyah bexsishsham abaanam, wuli tiyah nabii balih waanishaanam, wuli tiyah ufayit barhishaanah yaysherheerhegiinimhi dhic, akettoh barhsime afofuh waanishaanam, wuli tiyah lel amaa afof yayfissiriinimhi dhic akah yamxaye.

¹¹ Umbuka tayim abtam amaa inki Ufaye yekkeh, isheh akah farheekah umman tiyah barhsimte muttuxuwa yaxaye.

Inki nabse barhsime karimlih

¹² Tamaa inki nabsi barhsime karim akah leyaakah, umbuka nabsi karim, mangum kuuk, inki nabse kinni, Masiix lel amaa gina kinni.

¹³ Nanu Yahuud hido Giriik xiyaw, garuuza hido ishi finja le mara, inkoh inki nabsedde ninthimmiqhe, inkoh lel inki Ufaye naacubeya kabbatne.

¹⁴ Amayim lel, nabsi mango karim kibah inki karima maki leyam.

¹⁵ Ibi: “Anu gaba makiyomhi sabbatah, nabsi tiya makiyo” yerhxemko, taymih nabsi karima yakkiinim akah miracta.

¹⁶ Cokka lel: “Anu inti makiyomhi sabbatah, nabsi karima makiyo” terhxemko, taymih nabsi karima yakkiinim akah miracta.

¹⁷ Umbuka nabsi inti kuuk yineh yakkeedo, maabbo awla anniye dhadhdhe? Umbuka nabsi cokka kuuk yineh yakkeedo, unrayishnan awla anniye dhadhdhe?

¹⁸ Laakin akah taneekah, Yalli isheh akah farheekah nabsi karim cara-carah haye.

¹⁹ Umbukaahim inki karima kuuk tineh takkeedo, nabsi awla anniye dhaarhe?

²⁰ Amaydo kado, amaa karim yammango kibah, inki nabse kinni.

²¹ Inti gabak: “Atu yi mifarhshishsha”, amayim balih amo ibak: “Atu yi mifarhshishsha” akko tarhxo mirhicta.

²² Yakko kibah, tamaa rukutah higgidin nabsi karim mangum farhshishsham kinon;

²³ tamaa makko malemih nodde higgidin karimih, naba xishma akah naxaye, yabloona xoola kin karim lel meceetih alifna.

²⁴ Tayim lel yambulluwe ni karim kaa mifarhshishsha. Laakin Yalli tamaa xishma hin karimih naba xishma yaxaw ciloh, nabse meceetih yeyrhebeebeshe.

²⁵ Nabsedde barhsi miyanniye, yakko kibah karim lemille sittiya baclaysha.

²⁶ Inki karima waaxelsittemko, umbuka karim waaxelsiita; inki karima xishma geytemko, inkoh inkidde xedenan.

²⁷ Kado, atin Masiix nabse kitin, inkeekettah lel kaa karim kitin.

²⁸ Yalli lel amaa kaniisadde erherhih fartottit, malammih nobowa, maddaxih mudarrisiin haye, amaymik sarrah, bexsishsham aba mara, urusnan muttuxuwa le mara, xattimtam, yasxedeedere mara kee barhsime afofuh waanishsha mara haye.

²⁹ Inkoh fartottit kinooni? Inkoh nobowa kinooni? Inkoh mudarrisiin kinooni? Inkoh bexsishsham abaana?

³⁰ Inkoh urusnan muttuxuwa looni? Inkoh aki afofuh waanishaana? Inkoh yayfissiriini?

³¹ Tamaa naba muttuxuwa laakin hambereeroolih duumutanta. Anu lel ummanimko mangum yashshe arax sin ayballaw kiyo.