1 Korintos 11 - Saaho Cusub Cahde

¹ Anu Masiix misaal akah kataakah, atin yi misaal kataa mara tika.

Amo yaybuzuziinim

² Ummanidde yi xunsussaanah, tamaa labcad anu akah sinalle tillaabisheekah qath-ishshaanamhi sabbatah sin faylishak aniyo.

³ Laakin umman xiyawtohi amo Masiix kinam, numat amo lel labhatto kinam, Masiix amo lel Yalla kinam taarhagoona sinak farha.

⁴ Amo yabbuzuzeh dhaaco abe kee nabii balih waanishe yakke labhatti ishi amo yascundhuwe.

⁵ Amo abbuzuzekkah dhaaco abe kee nabii balih waanishe akkinnan numa, amo togoorhoye tiyä balih kinamhi sabbatah, ishi amo tascundhuwe.

⁶ Numa ishi amo aybuzuze waytemko, dagar tuyshudhdhurheh tagraco teelle tane! Numa ishi dagar tagricem hido taggoorhoyem laakin caybe kinamhi sabbatah, ishi amo taybazazoo.

⁷ Labhatti Yallih misle kee nabne kinamhi sabbatah ishi amo yabbazazo kaalle mitane, numa laakin labhatti nabne kinni.

⁸ Numa kinni labhattooko tunkhulluqhe tiyä kibah labhatti numaako mankhallaqhinna.

⁹ Amayim balih, numa kinni labhattoh tunkhulluqhe tiyä kibah, labhatti numah mankhallaqhinna.

¹⁰ Amaymih kinni, amaa malaykutti sabbatah, numa reezat tuumar amok hayto teelle tanem.

¹¹ Yakko kibah, Maddaradde lino aniinah laakin, numa labhatto hinnim marto mirhicta, labhatti lel numa hinnim maro mirhiica.

¹² Numa labhattooko akah tewceekah, kado labhatti numaako yaabuke. Ummannim lel Yallaako kinni.

¹³ Atin sinneh ifrida: numa amo aybuzuzekkah Yallah tassilliyem arax kinni?

¹⁴ Labhatti dagar yayrheerhem caybe kinam thabiica isheh sin tayduruse,

¹⁵ numa dherh dagar teellemko laakin, teyah kibra makini? Amayim lel dagar teyah yomxoyem bazuzeh kinamhi sabbatah kinni.

¹⁶ Akkinnanti tayimhi zacabah yankaaxado farhemko, nanu ta gina le labcad malino, Yallih kanaayis gantah male.

Maddari dirar

¹⁷ Takattiinim umaanih kibah mecaanih makinamhi sabbatah, ta santo sinah axayuk, sin mifaylisha.

¹⁸ Afti gabolle, kaniisak takattin gedda, sin fanadde barhsi yanem aabbe. Amayimko wulim rumma kinam aamine.

¹⁹ Sinko xaqqedde yane mari yamadhdhagoona ciloh, sin fanadde barhsi yakko alle tane.

²⁰ Inkidde takattin gedda, Maddari dirar maki bettaanam.

²¹ Bettan gedda, ummanti ishi-ishi dirar kinni beetam. Wuliti safriitak, aketti yaskire.

²² Ayim kinni tayim! Adde bettaanah adde taacubin carwa malitiini? Yallih kaniisa ilacteenih, tamaa hin mara xoolayshak taniini? Ayim sinak arhxo kinni? Taymih sin faylisho? Maale, sin mifaylisha.

²³ Tamaa sinalle tillaabishem Maddaraako kabbaatem kinni, Maddara kin Yeesus tamaa kaa yosxoyin bar kinnas yooqhoceh,

²⁴ cawwatoyshitek sarrah, yigdileyaako: “Tati sinah yomxoye yi nabse kinni. Tayim yi xunsusuh abanta” yerhxe.

²⁵ Amayim balih lel, kobbaaya gantah yooqhoceyaako, dirarak sarrah: “Ta kobbaayatti yi biiloh yakke cusub cahde kinni. Tayim aacubinnan gedda, yi xunsusuh abanta” yerhxe.

²⁶ Ta kinnas beetinnan gedda kee ta kobbaayatto aacubinnan gedda, Maddari yamiitendah kaa raba kinni warroyishshaanam.

²⁷ Amayimhi sabbatah, akkinnanti ammissilinnixe araxah Maddari kinnas beetemko hido Maddari kobbaayatto yoocobemko, Maddari nabse kee biili zacabah cagab wanna kinni.

²⁸ Amaydo, akkinnanti ta kinnas beetekkah, ta kobbaayatto lel aacubekkah, yookomeh ishe yamarmaroo.

²⁹ Akkinnanti Maddari nabse meceetih aarhigekkah beeteh yoocobemko, betto kee macabah ishi bukalle firde baahak yane.

³⁰ Amayimhi sabbatah kinni lel sinko mango mari yurkutiinih laxuuteenim, gari lel rabeenih yaniinim.

³¹ Laakin ninne rummah nifrideh nakkeedo, amfirride mirhaarhino.

³² Laakin ta caalamlih nanqitstsicemko, Maddari ni yafride gedda, araxah gaxna.

³³ Amaydo, yi saculo, bettoona inkidde takattin gedda sittiya ilala.

³⁴ Sin akotta firdeh takkemko ciloh, safriiteti yinniyemko, carelle beeto. Aki ractemih yekkemko, amiite gedda asxossas sinah axawo kiyo.