1 Korintos 10 - Saaho Cusub Cahde

Asnaamko zeelita

¹ Yi saculo, ni abbub inkoh darur ten agoogisheh, inkoh badko tillaabeenim sodhdhoona sinak mifarha;

² inkoh Moosaalih tiya yakkoona ciloh lel darur kee badadde yinthimmiqhin;

³ inkoh lel inki folo tinqiddiseya beeten,

⁴ inkoh lel inki macaba yinqiddiseya yoocobin. Amaa ten kataa yine yinqiddise qooqhaxko yoocobin, amaa qooqhax lel Masiix kuuk yine.

⁵ Yakko kibah, Yalli tenko mango maraalih mixedeninna, amaymih lel saxralle ten rashshit daga-yeenimille radeh raace.

⁶ Tayim lel tamaa usun umaani akah abeeniikah nanu tena balih umaani abnamko misaal nottah takko tekkem kinni.

⁷ “Amaa xiyaw beetoona kee yaacaboona defeyen; sarrah lel digiroona uguten” yarhxiinim tunkuttubeh akah taneekah, tamaa tenko garo balih asnaamah yacbude mara makkina.

⁸ Tenko gari uma-xibar abeenih inki lellecidde lamaatanna kee adox shixtiya akah rabeeniikah, uma-xibar abno nolle mitane.

⁹ Tamaa gari Maddara cakanadde saysheenih caroruh akah yeleyniikah, Maddara cakanadde sayishno nolle mitane.

¹⁰ Gari yemmeereriinih tamaa yaylaye malaykattoh akah yeleyniikah, nammaararo nolle mitane.

¹¹ Tayim nottah misaal takko alle obtem kinni, ta caalamti abayshima adde temeete nottah lel masxassa takko ciloh tunkuttubem kinni.

¹² Amaydo, daw-yerhxeh yanem ishe yakkaleti, radamko selito.

¹³ Xiyawalle obta cakanaako ziyaada sinalle moobta. Yalli umun kinni, sin qadreeko ziyaada lel cakana sinalle oobisho maki; cakanadde saytan gedda, amaa cakana curtoona ciloh akko tawcinikke sinah abo kinni.

¹⁴ Amaydo, yi kaxantoolito, asnaam cibaadaako mirix-erhexa.

¹⁵ Kas-le xiyaw balih kinni sinlih waanishak aniyom; anu arhxiyuk anem macalsita.

¹⁶ Tamaa nanu naybeereke barakat kobbaaya, Masiix biiloolih agle le tiya makini? Tamaa nanu nagdile kinnas, Masiix nabseelih agle le tiya makini?

¹⁷ Inki kinnas yanemhi sabbatah, amaa inki kinnas xazziilita marak, mango mara kino hanuk inki nabse kino.

¹⁸ Israa-eel xiyaw ubula, tamaa sadaqhaatim beeta mari amaa mazbax angalik yanin makini?

¹⁹ Aymih arhxem kinni? Tamaa asnaamah yaxaynim tamficem leya? Hido amaa asnaamti yamficem leya?

²⁰ Maale, tamaa Aki-mari junuunuh kibah Yallah maki yaxaynim arhxo farheh kinni. Atin junuunlih agle le mara takkiinim sinak mifarha.

²¹ Maddari kobbaaya toocobeh kee junuun kobbaayaako gantah taacabo mirhicta. Maddari maaddi betteh kee junuun maaddiiko gantah betto mirhicta.

²² Maddara ashshiinishno? Nanu kaako siriino?

Ummannim Yallih nabneh abanta

²³ Ummanim masmuux kinni, ummannim laakin tamficem maki. Ummannim masmuux kinni, laakin ummannim xiyaa carishsham maki.

²⁴ Ummanti ishi zoobattohi nafaaca kibah, ishi nafaaca wagiye wayo.

²⁵ Afcaadooko shakke sinnedde hayekkah, xazot cadaagalle anniinnanim inkoh beta.

²⁶ Amayim lel: “Baarho kee baarholle tanem Maddarim kinnih” kinni.

²⁷ Aamininnixe maraako inketti dirarah sinah deecimemko, atin lel tadawna fadhdheenimko, afcaadooko shakke sinnedde hayekkah, sinah asqirribinnanim beta.

²⁸ Akkinnanti: “Tayim asnaamah sadaqhah tomxoyem kinni” sinak yerhxemko, tamaa sinah warisha tiya kee sinni afcaadoh arhxitin amayim mibeetina.

²⁹ Sin afcaadok makiiki, kaa afcaadok arhxem kinni. Aymih kinni yi finja aketti afcaadoh tamfirridem?

³⁰ Anu xamdishiteh beete tiya ekkek sarrah, xamdishitemhi sabbatah aymih akah caddaalima?

³¹ Amaydo, betteenih toocobiinih, hido abinnannim, inkoh Yallih nabneh abanta.

³² Yahuud hido Giriik xiyaw hido Yallih kaniisa mirhafina.

³³ Tamaa anu abinnannimidde ummanti gargeerimo ciloh, inni nafaaca akkekkah mango marahi nafaaca takkem akah abaakah, atin gantah amah abanta.