1 Korintos 1 - Saaho Cusub Cahde

Salaamta

¹ Bawlos, Yallih farhih Masiix kin Yeesus fartotta yakko deeco akah tekkeya, kee ni sacal Sosteneesko,

² tamaa Korintosulle geytimta Yallih kaniisah, tamaa Masiix kin Yeesus araxah yinqiddisiinih tinqiddisem yakkoona deeco akah tekke marah, amayim balih tamaa inkoh ummanille notta kee tenhi Maddara yakke, ni Maddara kin Yeesus Masiix migac deecima mara fanah tadiye farto:

³ Ni Abba kin Yalla kee Maddara kin Yeesus Masiixko nicma kee maaxiyo sinlih takkoo.

Xamde

⁴ Masiix kin Yeesus araxah sinah tomxoye Yallih nicmah sabbatah, umman gedda inni Yalla xamdishita.

⁵ Umman ginah umbuka waani kee umbuka irhgah kayyadde gaddaalitteenih tanin.

⁶ Masiix zacabah tekke shahaada gantah sin fanadde tisbiteh tane.

⁷ Amaydo, Yeesus Masiix meceetih yamidhdhigem ilaalak sinak tanquse muttuxuwa mitane.

⁸ Ni Maddara kin Yeesus Masiix lellec abar hin mara takkoona ciloh, usuk abayshima fanah sin yaysabato kinni.

⁹ Yalli umun kinni. Ni Maddara kin Yeesus Masiix kaa Barhaalih zoobino taalloona sinah deecime.

Barhsa kaniisadde

¹⁰ Yi saculo, inkoh tiya tekkinyaako inki xisaab kee inki xagara abita kibah, sinne-sinneh barhsime waytoona Yeesus Masiix migacalle sin asuusa.

¹¹ Yi saculo, sin fanadde zagaxa tanem Kholoweeti dik yoh warisheenih yanin.

¹² Tayim akah arhxem lel sinko gari: “Anu Bawlos kataa”, hido “Anu Abolloos kataa”, hido “Anu Keefa kataa”, hido “Anu Masiix kataa” yarhxeh kinni.

¹³ Masiix xazziimeho? Bawlos sinah arhxuk masqalakke takarimeh rabeho? Hido atin Bawlos migacalle tinthimmiqhiiniho?

¹⁴ Anu Kirisbos kee Gaayosko bextih, sinko walaa inketta aythimmiqhe wayemih Yalla xamdishita.

¹⁵ Amaymih sinko walaa inketti yi migacalle inthimmiqhe yarhxo mirhiica.

¹⁶ Istifaanos xawaz gantah iythimmiqheh aniyo. Amayimko fertamah, aketto iythimmiqhe inne makkale.

¹⁷ Masiix mece ware warroysho kibah aythammaqho yi mifarinna. Masiix masqal ishi xaylaako foyya yakkemko ciloh lel, yi waanit dhicidde cikittem kuuk miyine.

Masiix Yallih kas kee xayla

¹⁸ Masqal farto yalaye marah duudiino kinni, gargeerimeh yane nottah laakin Yallih xayla kinni.

¹⁹ “Anu kas-le marahi kas aylawo kiyo, irhga-le marahi irhga lel foyyaysho kiyo” yarhxiinim tunkuttubeh tane.

²⁰ Kas-le ti awla yane? Sercat dhiiceeni awla yane? Ta waqhtih madareeni awla yane? Yalli ta caalamhi kasak duudiino akko abeh miyaneho?

²¹ Yallih kasadde, ta caalam ishi kasah Yalla maarhaginnamhi zacabah, xiyaw duudinoh yablin warroyishnan araxah yeemene mara gargeeram yikxineh yane.

²² Yahuud ishaarar yabloona esseran, Giriik xiyaw lel kas wagiyan,

²³ nanu laakin Yahuuduh andafo, Giriik xiyawah lel duudiino kinam, Masiix masqalak takarimem warroyishna.

²⁴ Too deeco akah tekke mari, inkoh Yahuud kee Giriik xiyawah laakin, Masiix Yallih xayla kee Yallih kas kinni.

²⁵ Yallih duudiino xiyaw kasko beyta, Yallih rukta lel xiyaw xaylaako beyta.

²⁶ Yi saculo, iski deeco aaginah sinah tekkem ubula. Sinko mango marak xiyaw araxah kas-le mara, hido xayla-le mara, hido lel maabakooko makaabun kuuk mitiniini.

²⁷ Yalli laakin kas-le mara xoolaysho, caalamalle duudiinodde loyyimtam doore; Yalli xayla-le mara xoolaysho, caalamalle ruktadde loyyimtam doore.

²⁸ Yalli caalamalle guba kinam, ilaacimtem, kee tamaa makko hinam gantah doore, amayim lel tamaa nafaaca lemidde loyyimtam foyyaysho ciloh kinni.

²⁹ Amayim lel xiyawti barha akkinnanti Yallih nifille falitamko ciloh kinni.

³⁰ Atin kaa sabbatah Yallih kas, xaqqe, anqaddas kee muuca noh yekke Masiix kin Yeesusudde kinni taniinim,

³¹ amayimih lel: “Falitinnanti Maddarah falitoo” yarhxiinim tunkuttubeh tane.