1 Bithroos 3 - Saaho Cusub Cahde

Sayyo kee baacil

^1-2 Amayim balih ko sayyo, sinni baacilih im-izzizanta. Tenko gari waanitta yaabbe mara walaa akke wayeenimih, waanitta hinnim gaxoona dhiican. Amayim lel tamaa xishma le mece sin gerh-gerh yabliinih kinni.

³ Sin bilca lel irooko dagar carhi kee dahab milah hido sarittan sarah akke waytoo.

⁴ Laakin, sin bilca tamaa Yallih intidde naba limo leh, alayinnixe carha-micneelih sukuun le ufaye kee afcaadodde sucutteh tane xiyaawinnah takkoo.

⁵ Basooko, Yalladde cag le tinqiddise sayyo, sinni baacilih yam-izziziinih, taginah kinni bilcitak yiniinim.

⁶ Amayim lel tamaa Saara Abraahimik, “maddara” akko terhxeyaako akah kaa aabbuk tineeka balih kinni. Atin lel tee cindham kitin, mecem abteenimko lel xiyaa mashshishshamko walaa inkimih mimashshiitina.

⁷ Amayim balih, atin lel ko baacilo, usun rukut sin zooba kinoonimhi sabbatah, sinni sayyoolih sittiya akah taabbin araxah maranta. Usun aniinat nicma sinlih yawrishe mara kinoonimhi sabbatah ten xishmatanta. Taginah sin dhaaco deesimto maki.

Xaqqeh arhxuk waaxelsiitaanam

⁸ Abayshimalle, atin inkoh, inki xisaab, naxrurta, sacoolinni kaxano, raxmatta-le afcaado abitteenih, amnonobba hin niya abitanta.

⁹ Umaani umaanih, hido waato waatoh maadabbinantaaki, amayimhi diddeh, tamaa sinah akah deecimen baraka geytoona ciloh dhaaco akah abanta.

¹⁰ Amayim lel Kutuub taginah yarhxemhi sabbatah kinni: “Aniina yakxano hambereerinnanti mece max lel yablo farhati, ishi anrab umaaniiko ishi wagub lel doolabah waanishaanamko yabbarhoo;

¹¹ umaaniiko gaxeh mecaani aboo; maaxiyo wagiyeh tee kataw.

¹² Amayim lel Maddari intit xaqqi-wanna yablin, kaa cokkak lel ten dhaacoh fakkittem kinamhi sabbatah kinni. Maddari nif laakin, tamaa umaani aba marahi didde kinni”.

¹³ Mecaani abtoona qeera le mara tekkiinimko, sina dhafa tiyah miyatti yane?

¹⁴ Atin walaa xaqqeh arhxitin waaxelsitteenih, baraka-lem kitin. Tenko mimashshiitina, miwaqhaaqhacitina,.

¹⁵ Sinni afcaadodde laakin, Masiix Maddara balih xishmatanta. Tamaa sin addadde yane cag hi sabbatah sin esserinnan tiyah radde taxawna inqirribanta.

¹⁶ Laakin tayim xiyaawinna kee xishmaalih abanta. Tamaa atin Masiix araxah litin mece gerh-gerhih waatima mari, tamaa waatoh xoolashshiitoona ciloh, cado-qalbe abitanta.

¹⁷ Amayim lel, Yallih farhi tekkemko, umaani abaanah waaxelsiitaanamko, mecaani abaanah waaxilsiitaanam tashshemhi sabbatah kinni.

¹⁸ Masiix gantah wuli gedda zambi-wannunuh waaxelsiite. Tayim abem lel xaqqi-wanna kinni hanuk, Yallalle ni baaho ciloh, xaqqi-wannun akkinnixe marah arhxuk inki geddalle umman tiyah waaxelsiite. Xazottaako kaa yigdifin, ufayeko lel yane tiya yekke.

¹⁹ Amaymik sarrah, ufayi araxah, yedeeyaako xabshedde yine ufayitille warroyshe.

²⁰ Ta mari lel kalxa tamaa Nuux naba doonik siraaximak, Yalli sabreelih ten ilaalak yine gedda, yaabbo xine mara kinoonimhi sabbatah kinni. Tamaa naba doonikidde tinemko lel dago mari, wuli baxxara xiyawti layeh yisillimin.

²¹ Tayim lel ta kado sin gargeera aythammaq tablem kinni. Aythammaq lel, tamaa rabaakohi ugut Yeesus Masiixiyahi araxah, cado-qalbeh Yallalle aban dhaacoh kibah, askok nabseeko kalaanamah maki.

²² Usuk carshelle yewceyaako, Yallih mizgi gabooko yane. Amalle lel malaykut, reezon kee xaylit akah angizzuuk yanin.