1 Bithroos 2 - Saaho Cusub Cahde

Yane dhayitto kee tinqiddise xiyaw

¹ Amaydo, umbuka umaani kee umbuka doolab, nifaaq, ashshiino kee dattosnan inkoh xabanta.

² Cusubih yooboke zabul balih, abayshimat sinni garger fanah carsimtoona ciloh, thaahir kin ufayi xanah hambereranta,

³ rummah akko dhacamteenih sarrah Maddari mece tiya kinni.

⁴ Tamaa xiyaw dhayitteh, Yallih intidde laakin doorimeh limo naba, yane dhayittolle amiituk tanin.

⁵ Atin sinneh yane dhayit tekkiinih ufayi care balih ginnimteenih tanin. Tayim lel yinqiddise sheekhino taalloona ciloh, tamaa Yeesus Masiix araxah Yallalle kabbat-le ufayi sadaqha bahtoona ciloh kinni.

⁶ Amayim Kutuub taginah yarhxemhi sabbatah kinni: “Taykinna, Tsiyoonulle dhayitto oobishak aniyo, ta ongolot dhayitti doorimeh limo naba tiya yekkeh, kayyah aamininnanti xoolashshiito maki.”

⁷ Amaydo, yaamine marak ta dhayitti sinalle limo naba tiya kinni. Tamaa aamininnixe maralle laakin, Kutuub: “Yandiqhe mari dhayiten dhayitti ongolot dhaa yekkeh yane”,

⁸ Amayim balih: “Xiyaa andafisha dhayitto, kee xiyaa cidda duma” kinni yarhxe. Amaa waanitta aabbe wayeenimhi sabbatah andafiten, tayim abaanam lel awwalko ten kelo tekkem kuuk tine.

⁹ Atin laakin tamaa diteeko cibra kin ishi ifo fanah sinah deecime tiyahi mecaani warroyishshoona ciloh doorimte xiyaw, nigsinnat sheekhino, yinqiddise dik, Yalli isheh yubbuxute xiyaw kitin.

¹⁰ Atin kalxa kaa xiyaw kuuk mitiniini, kado laakin Yallih xiyaw kitin; kalxa raxma kabbatteenih mitiniini, kado laakin raxma kabbatteenih tanin.

¹¹ Yi kaxantoolito, gerha kee duleenit kitiinimhi sabbatah, tamaa sin rooxeelih dhibbayta xazottat farhiiko sinne tabbarhoona sin asuusak aniyo.

¹² Tamaa umam aba mara balih sin xamitan gedda, sin mece abittot yubliinih kaa guftaaneh lellec Yalla yaynaboona ciloh, Aki-marahi nifille sinni gerh-gerh eymecanta.

Reezonuh yam-izziziinim

¹³ Maddarah arhxitin, reeza-le marah inkoh akah im-izzizanta. Tamaa ummanimko naba reeza-le nugus yakko,

¹⁴ tamaa umam aba mara yagzawna kee mecem aba mara cawatoona usuk dhirhiya masxadaadaritih yakko akah im-izzizanta.

¹⁵ Tayim kinni lel Yallih farhi: amayim lel sinneh mecem abak tamaa duudit kin xiyawhi sorha sik-ishishaanam kinni.

¹⁶ Yallih khaddamte balih, finja le xiyaw tekkiinih maranta kibah, sinni finjak umaanit goleena akko maabina.

¹⁷ Umman tiya xishmatanta. Sacoolinno ikxinanta. Yalla mashshita. Nugus xishmatanta.

¹⁸ Ko garuuzawo, atin lel sin wannunko tamaa mece mara kee xiyaawinna le marah bisa akkekkah, tamaa uma marah gantah umbuka xishmaalih akah im-izzizanta.

¹⁹ Yalli kixinam lel, tamaa Yallah arhxuk, akke-wayneh geyan xazan kee waaxelta curaanam kinni.

²⁰ Zambe abtan gedda, amayimille tumuttukiinih curteenimko, ayimti cawat geytaana? Mecem abak amayimille waaxelta curteenimko laakin, Yallih nifille tankixxinem tayim kinni.

²¹ Atin lel tayimih kinni decsimteenim, Masiix gantah sinah arhxuk waaxelsiitemhi sabbatah, kaa sarra kataytoona ciloh misaal sinah xabe.

²² Usuk zambe maabinna, walaa kaa afadde doolab misuginna.

²³ Akah waatimen gedda ishe balih miwaatiminna; waaxelsiite gedda lel xiyaa mimashshiishinnaaki, gaxe-gaxeh tamaa xaqqeh yafride tiyalle ishe amaanatishe.

²⁴ Zambeh rabneh xaqqedde marno ciloh, usuk isheh ni zambe tamaa masqal camiddakke takarime ishi nabsekke yooqhoce. Atin kaa biyokuh kinni urteenih taniinim.

²⁵ Atin ciido balih teleynih tinin, kado laakin tamaa sinni loyna kee sinni rooxih dhawrheenalle gaxteenih tanin.