Zechariah 9 - Syin Chin Bible

Ngampaamte tungah Thukhenna

¹ Hi thu in Topa ii thupuak ahi hi: Ama in Hadrach ngam le Damascus khuapi tungah daan piakna thutan zo hi. Israel namte bek hi ngawlin Syria khuapi zongh Topa neisa hi.

² Hadrach taw a kingamngi Hamath zongh ama ii neisa ahi bangma, Tyre le Sidon khuapite le a khut thiamna te theampo zongh ama ii neisa hi.

³ Tyre in ama atu in khuapi kulhpite vawt a, ngunn le khamhte a kholsa tam leilam ahiciangin leivui bang bek hi lel hi!

⁴ Ahihang a neisa theampo Topa in laak keaksak tu hi. Topa in a nei a lamh teng tuipi sungah vawksak tu a, tua khuapi kihaltum tu hi.

⁵ Ashkelon khuapi in hi teng mu in lau tu hi. Gaza khuapi in tuasia mu in na sa mama tu hi. Ekron zongh tuabang ma hi tu a, a lametnate bo tu hi. Gaza in a kumpi taan tu a, Ashkelon sia kitaisan in kinusia tu hi.

⁶ Minam kihel mite in Ashdod ah teang tu uh hi. Topa in, “Tua a kiphasak Philistine te theampo ka niamsak tu hi.

⁷ Amate in chi baanglai sate ahibuale a kikhaam an dangte ne nawn ngawl tu uh hi. A nungta laite theampo ka mite ii khen khat suak tu a, Judah nam sungah bee le phung khat in om tu hi. Ekron sia Jebus te bangma in ka mite suak tu uh hi.

⁸ Ka ngam ka cing tu a, ngalkaphonpite in ka kaantansak buatu hi. Kumpi ngilote in ka mite ka zothawsak nawn buatu hi. Ka mite thuakna sa teng mu zo khi hi,” ci hi.

Hong piang tu Kumpipa

⁹ Lungdam vun, lungdam vun, Zion mite awng! No Jerusalem mite awng, lungdam in au vun! En vun, na kumpipa no kungah hong pai hi! Ama in ngalzawna mualsua in lungdamna taw hong pai hi, Ahihang kiniamkhiak in laa khat — Laano, laatal no khat tungah to hi.

¹⁰ Topa in, “Ngal siphu leangte Israel pan ka heam tu a, Jerusalem pan siphute ka la tu hi; Ngal kisimna sung a kizangh thalte ka lalsak tu hi. Na kumpipa in minam tuatuamte sungah kilemna omsak tu hi; ama in tuipi khat pan tuipi khat dong, Euphrates ngun pan leitung mong dong uk tu hi,” ci hi.

Pathian Mite Kipuuaphat Kikna

¹¹ Topa in, “Sangaw biakpiakna chisan taw a kikipsak ka thuciamna hangin na saltanna mun, tui om ngawlna dum sung pan note kong suaktasak tu hi.

¹² Tu in lametna a nei no, saltaangte awng, heak kik vun; na ngam muanna munah heak kik tavun. Na thuakna sa theampo hangin a zaa nii in thupha kong piak kik natu thu, tu in note tungah kong son hi.

¹³ Keima in Judah sia ngalkap khat ii thal bangin, Israel sia thaltangte bangin ka zangh tu hi. Greece mite do tu in Zion pasalte sia namsau khat bangin ka zangh tu hi,” ci hi.

¹⁴ Topa in a mite tungah hong kilangh tu hi; ama in a thaltangte khualeng bangin kap tu hi. Vaanglianpipa Topa in a lemle tum tu a; thangsang pan vuipi suangval bangin hong kuan tu hi.

¹⁵ Vaanglianbelpa Topa in a mite sungsia tu hi, tuaciang amate in a ngalte susia tu uh hi. Amate sia ngal kisimna sungah zukhamte bangin au in, a ngalte chisan luangsak tu uh hi; tua chisan sia biaknatau tungah beal sung pan a kisung sangaw biakpiakna khat ii chi bangin luang tu hi.

¹⁶ Tua ni ciangin, tuucingpa in a tuute launa pan a huuk bangin, Topa in a mite hun tu hi. Amate in ama ngam sungah kumpilukhu tungah a suang manphate bangin taang tu uh hi.

¹⁷ Tua ngam sia bangza in pha a et hoi tu ziam! Khangnote in tua ngam pan a piang thaw an le sapittui neakna taw a thahat tu uh hi.