Zechariah 6 - Syin Chin Bible

Siphu ngalleang Li Mukholna

¹ Mukholna dang khat ma ka nei hi. Tusia hun ciang taau mual nii kilaklaw pan siphu ngalleang li hong pusuak ka mu hi.

² Siphu ngalleang khatna sia siphu sante, a niina sia siphu vomte,

³ a thumna sia siphu kaangte, a lina sia siphu pawl tiptepte in kai hi.

⁴ Tuaciang vantunglalang munah, “Topa awng, hi siphu ngalleangte ii a khiakna bang ziam?” ka ci hi.

⁵ Ama in, “Hite sia vui lite hi a; tuate in leitung bup ii Topa omna pan hong pai tawm hi,” ci in hong zo hi.

⁶ Siphu vomte ii kai leang sia saksang Babylon zuan tu a, siphu kaangte nitumna sang zuan tu hi, siphu pawl tiptepte thangsang ngam zuan tu uh hi.

⁷ Siphu pawl tiptepte hong pusua ciangin leitung enkot nuam kisa in a pai tu kaal ngakla uh hi. Vantunglalang in, “Pai vun a, leitung enkot tavun!” ci a — tuaciang tuate pai uh hi.

⁸ Tua zawkciang vantunglalang in hong oksan a, “Saksang Babylon ah a pai siphute in Topa thin uukna thimsak zo hi,” hong ci hi.

Joshua Kumpilukhu khuksak natu Thupiakna

⁹ Topa in hi thu hong pia hi.

¹⁰ Ama in, “Saltaangte ahi Heldai, Tobijah le Jedaiah te ii piak letsongte la in Zephaniah tapa Josiah inn ah thakhat ma pai in. Hi mite Babylon ah a saltanna pan hong heak kik siat zo hi.

¹¹ Amate hong piak khamh le ngunn te taw kumpilukhu khat vawt in a, Jehozadak tapa Thiampi Lianbel Joshua lu tungah khusak in.

¹² Vaanglianbelpa Topa in, ‘Thingbaak a kici mihing khat ama omna munah khangto tu a, Topa Biakinnpi sa kik tu hi.

¹³ Tuasia a sa tu sia ama hi a, kumpi khat patoai natu a kilawm teng ama in tangin, a mite uk tu hi. Thiampi khat ama kumpi tokhum kungah ding tu a, amate in kilemna le kituiton natu seam khawm tu hi,’ a ci teng ama munah son in.

¹⁴ Tua kumpilukhu in, Heldai, Tobijah, Jedaiah le Josiah te upatna le phawk natu in Topa Biakinnpi sungah om tu hi,” ci hi.

¹⁵ A khuala ah a teang mite hong pai tu a, Topa Biakinnpi sakkikna ah hong hu tu hi. A sakkik sia a man ciang, Vaanglianbelpa Topa in kei sia nang kungah hong paisak hunlam na he tu hi. Topa na Pathian hong thupiak teng na zui le hi thu teng theampo hong piang tu hi.