Zechariah 13 - Syin Chin Bible

¹ Vaanglianbelpa Topa in “Tua hun hong thet ciang, David suan le paalte le Jerusalem mite mawna le milim biakna pan thiansua natu in tuinaak khat hong phuul tu hi.

² Tua hun ciang ngamsung pan milimte min theampo ka phiat tu a, kuama in ciamtee nawn ngawl tu hi. Kamsaang ka hi a ci khat pawpo le, milim biak tu a lungngulna ka heam tu hi.

³ Tuaciang khat po in kamsaanna a zom nuam hamtang lai le, a pa le a nu in nang hong kithatlum nanak tu hi, ci tu hi, ama in Topa ii kammalte ka pau ci napi, leilot thu a son hang ahi hi. Ama ii kam a san ciang, a pa le a nu in nam taw hollum tu hi.

⁴ Tua hun hong thet ciang kamsaang kuama in a mukholna hu in kiphasak ngawl tu a, kamsaang khat bangin ngamta ngawlin, kamsaangte puan hampuite ngualtheam natu in silh ngawl tu hi.

⁵ Tua taangin ama in, ‘Kei kamsaang hi bong. Kei lothopa khi hi — ka khan tawntung lo ka tho hi’ ci zaw tu hi.

⁶ Tuasia ciang khat po in, ‘Na awm a liammate bang ziam?’ ci in a dongh le ‘Lawmte khat ii inn pan ka nga hi’ ci in zo tu hi,” ci hi.

Pathian Tuucingpa Thalup natu Thupiakna

⁷ Vaanglianbelpa Topa in, “Namsau awng, khanglo in kei atu a seam tuucingpa sim ta'n! Ama thatlum in, tuaciang tuute kithethaang tu hi. Ka mite ka sim tu a,

⁸ tuaciang, ngam bup sungah mihingte see thum sua see nii thi tu uh hi.

⁹ A nungta lai khen thum sua khen khat teng ka sit tu a, meikuang taw ngunnte a kithiansak bangin amate ka thiangsak tu hi. Khamh a kisit bangin amate ka sit tu hi. Tuaciang amate in thungen tu a, keima in ka zo tu hi. Amate tungah ka mite ahi hunlam ka son tu a, amate in keima Pathian ka hi hunlam pualaak tu uh hi,” ci hi.