Thupualaakna 7 - Syin Chin Bible

Israel Mite 144,000

¹ Hisia zawkciang leitung king li ah a ding vantunglalangte li ka mu a, leitung ah ahizong tuipi tungah ahizong, thingkung khat po tungah ahizong, vui a vak ngawl natu in amate in vuipi lite lencip uh hi.

² Tua zawkciang a nungta Pathian ii tepteena toai in nisuana sang pan vantunglalang a dang khat hong paito ka mu hi. Ama in awnging tak taw, leitung le tuipi lalsak tu a, Pathian ii vaang a piak vantunglalang lite sam hi.

³ Tua vantunglalang in, “Pathian naseamte talki tungah tepteena a kivawt siat mateng, leitung, tuipi le thingkungte susia heak lai vun,” ci hi.

⁴ Tuaciang a talki tungah Pathian ii tepteena a nga sia 144,000 pha hi ci in kei tungah hong kison hi. Amate sia Israel minam sawm le niite pan hi a,

^5-8 nam khat ciangin tulsawm le tulnii veu ahi: Judah, Reuben, Gad, Asher, Naphtali Manasseh, Simeon, Levi, Issachar, Zebulun, Joseph le Benjamin suante ahi uh hi.

A tam mama Mihonpi

⁹ Hisia zawkciang ka et le, kuama ii sim zawk ngawl tu mihonpi khat om hi! Amate sia minam, bee le phung, ngam tuatuam le kam namcin pan hi a, amate in puantual kaang silh a, a khut sungah palm sawl toai in Tuuno kumpi tokhum mai ah ding uh hi.

¹⁰ Amate in awnging takin au uh a, “Kumpi tokhum tungah a to ih Pathian le Tuuno kung panin, Ngupna hong pai hi,” ci uh hi.

¹¹ Vantunglalangte theampo kumpi tokhum, upate le nganhing nungta lite kiimkot ah ding uh hi. Tuaciang amate in kumpi tokhum mai lei ah boksuk in Pathian bia uh a,

¹² “Amen! Pokna, minthanna, ciimna, lungdamkona, upatna, vaangletna le thahatna ih Pathian in a tawntung a tawntungin nei tahen! Amen!” ci uh hi.

¹³ Upate khat in, “Hi puantual kaang silhte a kuate hi a, koisung pan hong pai ziam?” ci in hong dongh hi.

¹⁴ “Topa awng, he ngawl khi hi. Nangma he ni hi,” ci in ka zo hi. Ama in, “Hite sia vawtsiatna nasia mama sung pan a suaktate hi. Amate in a puantualte silthiang zo a, Tuuno chi taw kaanghsak zo uh hi.

¹⁵ Tua ahi hu in, amate sia Pathian kumpi tokhum mai ah dingin sun taw zan taw a biakinn sungah ama atu in na sepsak uh hi. Kumpi tokhum tungah a to pa in amate sia ama ompuina taw dal tu hi.

¹⁶ Amate in ngilkial, dangko kik ngei nawn ngawl tu hi; ni le satna a nei dangte in amate sia kaangh ngawl tu hi,

¹⁷ banghang ziam cile kumpi tokhum laizang ah a om Tuuno in amate ii tuucingpa hi tu a, amate sia nuntakna a pia ciktuite ah paipui tu hi. Tuaciang Pathian in amate mittang sung pan thitui theampo nawlsak tu hi,” hong ci hi.