Thupualaakna 17 - Syin Chin Bible

A minthang Pumpi zuak Numei

¹ Khawbeam sali a nei vantunglalangte sali sung pan khat kei kungah hong pai in, “Hong pai ta'n, a minthang pumpi zuak nu, ngun tam mama hui ah a kisaat khuapi sia bangbangin daan kipia tu ziam, ci in kong lak tu hi.

² Leitung kumpipate in ama taw paktat khialna vawt uh a, leitung mihingte in ama ii paktatna sapittui ne in kham uh hi,” ci hi.

³ Thaa in kei hong uk a, tua zawkciang vantunglalang khat in, sennealngam khat sungah hong paipui hi. Tua munah numei khat sia, a pumpi tung theampo a dim in, Pathian selnona minte a ki at nganhing san khat ii tungah a to ka mu hi; tua nganhing in lutang sali le kii sawm nei hi.

⁴ Numei in puan sandup le puansan silh in, khamh kizepna tuatuamte, suang manphate le keptangte taw kizeam hi. Ama khut sungah a paktatna pan, a piang a kiihuai le a nin nate taw a kidim khamh hai khat toai hi.

⁵ A talki tungah, min khat ki at a, a kiphualseal khiakna sia: “Leitung ah numei pumpi kizuak theampo le zummawk ngamtatna neite ii nu, A lian Babylon,” ahi hi.

⁶ Tuaciang numei nu sia Pathian ii mihingte chisan le Jesus tungah a thumaan uh hu in a kithatte chisan sia zukham bangin a kham ka mu hi. Ama ka mu ciangin lamdang ka sa mama hi.

⁷ “Banghangin lamdang sa ni ziam?” ci in vantunglalang in hong dong hi. “Numei le ama a pua lutang sali le kii sawm a nei nganhing ii a kiphualseal khiakna sia kong son tu hi.

⁸ Nganhing sia khatvei lai nungta ngei ahihang tu in nungta nawn ngawl hi; ama sia a hawng thukpui sung panin, hong pusuak to dektak zo a, a kisusia tu in pai tu hi. Leitung bitphua ma in, nuntakna laibu sungah a min uh a kikhum ngawl, leitung ah a nungta mihing theampo in, nganhing sia a et uh ciangin, lamdang sa tu uh hi. Ama sia khatvei lai in nungta ngei hi; tu in nungta nawn ngawl hi, ahihang khatvei hong kilangh kik tu hi.

⁹ “Hi sia taw kisai in, ciimna le teltheina nei tu kisamh hi. Lutang salite in, tua numei tona mual sali ahi hi. Amate in kumpi salite zongh ahi hi:

¹⁰ amate sung pan nga sia taak zo a, khat sia maang lai hi; tuaciang a dang khat sia hong pai ngawl lai hi; hong pai ciang zong tawmvei bek uk tu hi.

¹¹ Tuaciangin khatvei nungta ngei ahihang tu in a nungta nawn ngawl nganhing sia ma in, kumpi a liatna hi, ama sia salite sungah kihel a, a kisusia tu in pai tu hi.

¹² “Kii sawm na mu teng sia, ngam uk tu a kipan ngawl lai kumpi sawmte hi, ahihang tua nganhing taw nai khat sung ukna thuneina a kipia khawm tu kumpite ahi uh hi.

¹³ Hi sawm teng in tupna kibang nei uh a, a vaangneina le a thuneina uh sia nganhing tungah pia tu uh hi.

¹⁴ Amate in Tuuno sia do tu uh hi; ahihang Tuuno in ama sapsa, tealsa le a thumaan nungzuite taw kopin zothal tu uh hi, banghang ziam cile ama sia topate ii Topa, kumpite ii Kumpipa ahi hi,” ci hi.

¹⁵ Vantunglalang in hi bangin hong ci si hi, “Pumpi zuak nu ii a tung a to laitak na mu tuite sia ngamte, mihingte, minamte le kampaute ahi hi.

¹⁶ Kii sawm na mute le nganhing in pumpi zuaknu sia ensan tu hi; ama ii neisa theampo sia amate in laaksak tu a, a pumnguak in nusia tu hi; ama sa ne tu a, mei taw ama sia haltum tu hi.

¹⁷ Banghang ziam cile Pathian in, amate ii thinsung ah ama tupnate a sep khop nop natu, Pathian kammalte a tun mateng a uk natu in, nganhing tungah amate vaangneina pia uh hi.

¹⁸ “Numei na mu sia in leitung kumpite a uk khuapi lian sia ahi hi,” ci hi.