Thupualaakna 13 - Syin Chin Bible

Nganhing Niite

¹ Tua zawkciang nganhing khat, tuipi sung pan hong pusuak ka mu hi. Ama in kii sawm le lutang sali nei hi; a kiite khat sim tungah kumpilukhu khat tek om a, a lutang khat sim tungah Pathian selnona min khat tek om hi.

² Tua nganhing sia pawlbeam bang hi a, a peang sia vom peang bang hi in, a kam sia tawpi kam bang ahi hi. Ngulpui in tua nganhing tungah, ama ii vaangletna, a kumpi tokhum le a lian thuneina teng pia hi.

³ Nganhing lutang khat sia thi dektakin a liam taw kibang napi a liamma sia dam kik zo hi. Leitung theampo in lamdang sa in hi nganhing nung zui uh hi.

⁴ Ngulpui in tua nganhing tungah ama thuneinate pia ahikom, mihing theampo in ngulpui a bia uh hi. Amate in nganhing zongh bia uh a, “Akua in hi nganhing taw kibang ziam? Akua in ama do zo tu ziam?” ci uh hi.

⁵ Nganhing sia Pathian selnona kamte taw a kiphatsak natu le tha sawmli le tha nii sung teng thunei thei tu in thu kipia hi.

⁶ Ama in Pathian min, a teenna le vantung ah a teangte theampo haamsiat tu in kipan hi.

⁷ Ama sia Pathian ii mihingte do tu le a zo tu in kivawt a, bee le phung, ngam, pau namcin le minamte tungah thuneina kipia hi.

⁸ A kithatlum Tuuno ii neisa ahi leitung kibitphua ma a nuntakna laibu sungah a kikhum min neite simngawl, leitung a teang mihing theampo in a bia tu uh hi.

⁹ “Tua ahiciang bil na nei uh le ngai vun!

¹⁰ Ngalmat tu in a kitavaw peuma kiman takpi tu a, namsau taw thalup tu in a kitavaw peuma namsau taw ma kithatlum tu hi. Hite hu in Pathian ii mihingte tungah thuak zawkna le upna kisamh hi,” ci hi.

¹¹ Tuaciang leisung panin hong pai to nganhing dang khat ma ka mu hi. Ama in tuuno kii bangin kii nii nei a, ama in ngulpui pau bangin pau hi.

¹² Ama in nganhing masa sia ii thuneina lian tengma ama mai ah zangh hi. Ama in leitung le a tungah a om theampo in a liamma a damsa nganhing masa sia biasak hi.

¹³ Hi nganhing niina sia in, a nasia nalamdang laknate vawt hi; ngual theampo mu tangin vantung panin leitung ah meikuang taaksak hi.

¹⁴ Nganhing masa sia ii mai ah vawt thei natu thu a nga bangin nalamdang laknate taw leitung mihing theampo theam hi. Tua nganhing in namsau taw kiliamsua napi a nungta lai nganhing sia upat natu in milim khat a vawt natu amate sawl hi.

¹⁵ Nganhing niina sia in nganhing masa sia ii lim sia a pau thei natu le ama a bia ngawl theampo a thalup thei natu in a sungah nuntakna hu a khum thei natu thu nga hi.

¹⁶ Nganhing in a no a lian, a hau a zawng, sila le sila ngawl mihing theampo ii ziatsang khutte tungah le a talkite tungah tepteena a vawt natu in zawthawk thu taw sawl hi.

¹⁷ Tua nganhing min ahibuale, a min luangin a kizangh nambat tepteena a nei ngawl peuma vanh lei vanh zuak thei ngawl tu hi.

¹⁸ Hi thu sungah ciimna zak thei tu kisamh hi. Khua ngaisut theina a nei peuma in nganhing nambat sia ii khiakna sia tuat thei tu hi, banghang ziam cile, tua nambat sia mihing khat ii min ahi hi. Tua nambat sia 666 ahi hi.