Thuhil kikna 10 - Syin Chin Bible

Moses in Thupiakte Nga kik

¹ “Tuasia ciang Topa in kei tungah, ‘A masa a te bangma in suangpheak nii vawt in a, a koi natu thingkuang khat vawt in. Keima kung mual tungah hong kaato ta'n a,

² na tapsak suangpheakte tungah ka at tengma tua suangpheakte tungah ka at tu a, tua zawkciang tuate thingkuang sungah na koi tu hi,’ hong ci hi.

³ “Tua ahiciang acacia thing taw thingkuang khat ka vawt a, a masa lai a sia taw a kibang suangpheak nii vawt in mual tungah ka paipui to hi.

⁴ Tuaciang Topa in tua suangpheakte tungah a masa a at kammalte, mualtung na kikhop uh ni in meikuang sung pan note tungah hong son Thupiak Sawmte at hi. Topa in tua suangpheakte kei hong pia a,

⁵ tuaciang kiheakin mualtung pan ka tuaksuk hi. Tua zawkciang Topa thupiak bangin ka vawtsa thingkuang sungah tuate ka koi a — tua hun pan kipan tualai ah om hi,” ci hi. (

⁶ Israel te sia Jaakan mite ii tuikhukte pan pai in Moserah zuan uh hi. Tua munah Aaron thi in kivui a, a tapa Eleazar in a thiampi za laih hi.

⁷ Tua mun pan amate Gudgodah ah pai uh a, tua mun pan tui tam omna mun Jotbathah theng uh hi.

⁸ Mual tungah Topa in Thuciamna Thingkuang a cing tu, thiampi na a seam tu, tuaciang ama min suangin thupha a pia tu in Levi namte nasep pia hi. Hi nasepte tu dongin amate nasep hi lai hi.

⁹ Tua ahikom Levi nam in nam dangte nga bangin lo ngam nga ngawl hi; amate ii nga sia Topa na Pathian ii kamciam bangin Topa ii thiampite a hina hamphatna sia ahi hi.)

¹⁰ “A masa lai bangma in mual tungah sun sawmli le zan sawmli ka om hi. Topa in khatvei ka thu hong ngai lai a, note hong mot ngawl tu thukim hi.

¹¹ Tuasia ciang ama in na taanghpupite tungah piak tu in a kamciamsa ngam le lei na nga thei natu uh note lampui in a pai tu kei hong sawl hi.

Pathian ii A ngette

¹² “Tu in Israel mite awng, Topa na Pathian ii note tungah hong nget thute pha tak ngai vun: Topa bia vun a, hong thupiak theampo zui vun. Na thin theampo uh taw ama it in, a na seam tavun a,

¹³ a thukham theampo zui vun. Note phattuam natu in tuni in tuate kong pia hi.

¹⁴ A saangbel vantungte ngawngawn Topa neisa hi a, leitung le a tung a om na theampo zongh ama ii neisa ahi hi.

¹⁵ Ahizong Topa in na taanghpupite a itna lian mama ahikom midangte taangin note hong teal a, note sia ama tealsa te na hi lai uh hi.

¹⁶ Tua ahiciang tu pan kipan Topa thu ni tavun a, na thinpuisak nawn heak vun.

¹⁷ Topa na Pathian sia pathiante theampo tung le a vaang nei theampo tungah thu neibel hi. Ama lian in thahat a, kiitak tu ahi hi. Ama in nguptuam nei ngawl a, sumnguk saang ngawl hi.

¹⁸ Ama in tangate le meingongte a pha in vawt a, eite sungah a teang ngamdangmite it in, an le puansilhte pia hi.

¹⁹ Tua ahikom tua ngamdangmite tungah itna lak vun, banghang ziam cile note khatvei Egypt ngam ah ngamdangmi ma hi ngei nu hi.

²⁰ Topa na Pathian ii thu ni in ama bek bia vun. Ama tungah thumaan in ama min bek suangin na kamciamna te vawt vun.

²¹ Ama pok vun — ama na Pathian uh hi a, noma atu a vawt a lian le a lamdang nate na mit mama uh taw mu nu hi.

²² Na taanghpupite Egypt ngam ah a pai lai in mihing sawmsali bek pha hi. Ahizong tu in Topa na Pathian in note van ah aksi bangza in tam mama hong phasak zo hi.