Solomon ii La 6 - Syin Chin Bible

Ngaknute ii sak

¹ A mealphabel numei awng, na it na lawmpa koi sungah pai ziam? Na mu natu kong hu thei natu uh in bang lampi tawn ziam, hong son ta'n.

Ngaknu ii sak

² Ka ngaino sia balsam thing pona mun a huan sungah pai zo hi, Ama in a tuu honte a huan sungah tha a, unok paakte lo hi.

³ Ka ngaino sia keima aa hi a, keima in ama aa ka hi hi. Ama in a tuu honte unok paak sungah tha hi.

La A ngui ngana Tangval ii sak

⁴ Ka ngaino awng, nang sia Tirzah bangin na mealpha a, Jerusalem khuapi bangin ithuai in, hi khuapi liante bangin na mealphatna in husan ngawngawn hong tawpsak tha liang hi.

⁵ Na mittangte kei sang panin heam in, tuate in kei hong cimawsak hi. Na samte sia Gilead mual pangh suk ah keal honte tai valet bangin kithing hi.

⁶ Na hate sia a kisilthiang tuu honte bangin paak hi. Khat beak zongh a peuhe om ngawlin kikim diimdiam hi.

⁷ Na mai sealna dial nungah na biangkhote san sitset hi.

⁸ Kumpipa in zi sawmluk, zino sawmliat, a kisim zo ngawl ngaknu moi nei tahen!

⁹ Ahihang keima in khat bek ka it a, ama sia vakhu khat bangin ithuai hi. Ama sia a nu ii tanu khat bek a nei hi a, a nu ii a it mama tanu ahi hi. Numei theampo in ama en in pok uh hi; a zi le a zinote in ama pokna lasa uh hi.

¹⁰ Zingsang khuavak taw a kibang hisia nu akua ziam? Ama a mealpha a, taang hiihee a, ni bang tha bangin tee hi.

¹¹ Ngamkuam sungah thingnote en tu, sapitkung tungah a teeno suakte en tu le talee kung tungah a paakte en tu in Almond kungte sungah ka paisuk hi.

¹² Siphu ngalleang hawlpa ii ngal sim tu lawpin a liin bangin nang kong it hu in ka liing hi.

Ngaknute ii sak

¹³ Shulam ngaknu awng, laam in, laam in, Na lap kong en tu uh hi. A ngual a ngual a hong en te ii kilaklaw ah ka lap sia banghangin hong en nuam nu ziam?