Solomon ii La 2 - Syin Chin Bible

¹ Keima in Sharon ah ngampaak khat ka hi lel a, mualkuam ah unok paak khat ka hi lel hi.

Tangval ii sak

² Ling kawm a unok paak khat bangin numeite sungah ka it ngaino om hi.

Ngaknu ii sak

³ Ka itbel ka lawmpa sia tangval dangte taw teengat ciang thingtang sungah apple kung khat taw kibang hi. Ama ii limh sungah ka to nuam a, a nga sia thum ka sa hi.

⁴ Ama in a an neakna innpi sungah kei hong paipui a, itna mai taw hong en hi.

⁵ Lungzuang duangvul ka hikom sapitnga kote taw ka tha hong dimsak ta'n a, apple nga taw hong thak sua ta'n!

⁶ A baan veisang hong khamhsak a a ziatsang khut taw hong koai hi.

⁷ Jerusalem numeite awng, ka ki itna nong pheltan ngawl natu in a zuanngang sangaite le sazate min lo in kei hong kamciam tavun.

La A ngui Niina Ngaknu ii sak

⁸ Ka ngaino ii aw ka za hi. Ama sia mualpi tungah tai kawmin hong pai a, mualnote kaantan in ka kung hong zuan hi.

⁹ Ka ngaino sia saza khat bang, sangai moi khat bang ahi hi. Ama sia ka innpang kungah ding hi. Ama in kongkha pan puankhaite pailet in inn sung sang hong en hi.

¹⁰ Ka ngaino in kei hong paupui hi. Ka ngaino awng, hong pai ta'n, ka it ngaino awng hong pai ta'n.

Tangval ii sak

¹¹ Phalbi bo zo a, nguatui kang zo hi;

¹² ngam sungah paakte palh hi. Hi hun sia lasak hun hi a, lo sungah vakhute kuul kiza hi.

¹³ Theite min tu kipan a, sapit paak ngimnamtui zongh kiza zo hi. Tua ahiciang hong pai ta'n, ka ngaino awng; Kong it ngaino awng hong pai ta'n.

¹⁴ Nang sia suanghawng kawmah a buu vakhu khat bang na hi hi. A ngaibaang na meal hong musak ta'n a, a lungzuanhuai na aw hong zasak ta'n.

¹⁵ Ih sapitkungte paak zo ahikom ngia honte ii a lalcipsak ma in ngiano honte man in.

Ngaknu ii sak

¹⁶ Ka ngaino sia keima aa hi a, keima in ama aa ka hi hi. Ama in a nganhonte unok paak sungah,

¹⁷ zingvui a vak vahiau ma le khuavak mahiat dong cing hi. Ka it ngaino awng, Bether mual lian tungah a om saza khat le sangai moi khat bangin hong heak kik ta'n.