Solomon ii La 1 - Syin Chin Bible

¹ Solomon ii phua la a phabel teng

La A ngui Khatna Ngaknu ii sak

² Na muk taw nong tawp a, nong itna in sapittui sangin thum zaw hi.

³ Na pum tungah a namtui na khat om a, na min in tuasia ma phawlo hi. Nang hong it thei ngawl numei om ngawl hi.

⁴ Hong pui ta'n a, ih tai tu hi; ka kumpipa hong hi ta'n a, na inndoi sungah hong paipui ta'n. Ih lungdam khawm tu a, nasia tak dawn khawmin, ki itna sungah suakta takin ih omkhawm tu hi. Numei theampo ii nang hong it sia lamdang ngawl hi!

⁵ Jerusalem numeite awng, kei ka ci vom hi, ahihang ka mealpha hi. Kedar ah sennealngam tuipuanbuk bangin vom kaleng Solomon ii kumpi inn sungah puankhaite bangin ka mealpha hi.

⁶ Ka ciivom hu in, hong nomu heak vun, banghang ziam cile nisa ka thuak hang ahi hi. Ka suapui pate in kei tungah hong thin uuk ahikom sapithuan sungah na hong seamsak hi. Keima le keima ka kipua tu hun ka nga bua hi.

⁷ Ka ngaino awng kei hong son ta'n, na ngannote koisungah na tha tu ziam? Sunkim nisa ciang koisungah tawlnga tu ni ziam? Tuucing dangte ii tuuhon kawm ah banghang kong zon kul tu ni ziam?

Tangval ii sak

⁸ Numei sung pan a ithuaibel awng, a mun he ngawl ni ziam? Pai in tuuhonte zui ta'n; na kealte atu in tuucingte ii buk hui ah lo hingna mun zong ta'n.

⁹ Ka ngaino awng, Pharaoh ii siphu ngalleang a kai siphutalte a thin a thosak siphupui bangin pasalte thin na thosak hi.

¹⁰ Na sam sia na biangkho tungah hoi niingniang a na ngawng kiim ah suang manphate bangin kibaang hi.

¹¹ Ahihang nang atu in khamh khi ngui khat ih vawt tu a ngunn kizepna taw ih zeam tu hi.

Ngaknu ii sak

¹² Ka kumpipa sia a lupna tungah lum a, ka paaknamtui ngim kizel hi.

¹³ Ka ngaino ka awm tungah hong lup ciang myrrh ngimnamtui nam hi.

¹⁴ Ka ngaino sia Engedi sapithuante sungah a palh duisung paakte bang ahi hi.

Tangval ii sak

¹⁵ Ka ngaino awng bangza in na mealpha ziam; na mittangte bangza in ithuai vakil ziam?

Ngaknu ii sak

¹⁶ Kong itbel awng, na etlawm mama a, nong lungkimsak mama hi! Lopa hingte ih lupna hi tu a;

¹⁷ Cedar thingte sia ih inn thulnuai hi a, cypress thingkungte ih innciing dap hi tu hi.