Sawltakte 18 - Syin Chin Bible

Corinth khua ah

¹ Hisia zawkciang, Paul in Athens nusia in Corinth ah paisuak hi.

² Tua munah ama in Italy pan a zi Priscilla taw hong pai tawm Pontus khua ah a suak Jew te Aquila a kici khat taw kimu hi, banghang ziam cile Kumpilianpa Claudius in Jew te theampo Rome khua a nusiat natu in, thupia hi. Paul in amate taw kimu tu in pai a,

³ amate taw taam khawm naseam khawm in om hi, banghang ziam cile amate bangma in, Paul in a nuntak natu in tuipuan buk khui hi.

⁴ Ama in Jew te le Greek te a telsak thei natu in, Sabbath ni simin synagogue ah thu kikum khawm uh hi.

⁵ Macedonia pan Silas le Timothy a thet ciang, Paul in hunbit in thuhilna zangh a, Jesus sia Messiah hi ci in Jew te tungah tetti pang hi.

⁶ Amate in nalh in, ama huvau kamsia a pau uh ciang, ama in a lungkim ngawlna a lakna in, a puan tungah leivui baangte thin a, “Na mangthang uh le noma mawna hang hi tu hi! Kei hang hi ngawl tu hi. Tu pan kipan Gentile te kungah pai tu khi hi,” ci hi.

⁷ Tua ahikom amate nusia in, Titius Justus kici Pathian a bia Gentile mite khat ii inn ah teang tu in, pai hi; tua pa ii inn sia synagogue hui ma ahi hi.

⁸ Jew te ii synagogue ah a lampuipa Crispus le a innkuanpui theampo in Topa um uh hi; Corinth a midang tam mama in ngupna thu za uh a, um in tui kiphum uh hi.

⁹ Zan khat Paul in mukholna nei a, Topa in ama tungah, “Lau heak in, na son ngei bangma in son in a, tua thu thasua heak in,

¹⁰ banghang ziam cile keima in nang hong ompui ka hikom, kuama in nang hong susia thei ngawl tu hi. Hi khuapi sung a om mihing tam mamate sia keima mi ahi hi,” ci hi.

¹¹ Tua ahikom Paul in tua munah kum khat le kum lang taam a, mihingte tungah Pathian kammal hil hi.

¹² Gallio sia Rome kumpite in Achaia ngamuk mangpa tu in a koi uh ciangin, Jew te hong kikhawmtua a, Paul manin, thukhenzum ah paipui uh hi.

¹³ “Hi sia pa in thukham taw a kisi ngawl biaknazia taw Pathian biak natu mihingte zol tu in hanciam hi!” ci uh hi.

¹⁴ Paul in thuson tu in a kithoai laitak, Gallio in Jew te tungah, “Hi thu sia ngitlo khialna lian ahibuale khialna khat po a vawt ahi tha le, no Jew te tungah kong thinsau kenkon natu kilawm hi.

¹⁵ Ahihang hi thu sia kammalte, minte le noma thukham taw kisai thu kinialna ahikom noma tek ma in khensat hamtang tavun. Tuabangte tungtaang ah thukhenpa seam ngawl tu khi hi!” ci hi.

¹⁶ Tuaciangin amate sia zum sung panin, not hi.

¹⁷ Amate theampo in synagogue lampuipa Sosthenes man uh a, zum mai ah vel uh hi. Ahihang Gallio in tuasia tawm zongh a awlmaw bua hi.

Antioch khua ah Heak kik

¹⁸ Paul in Corinth khua ah thu umte taw ni tam ma taam a, tua zawkciang amate nusia in Priscilla le Aquila taw Syria ah teambaw taw ding uh hi. Cenchreae pan teambaw taw a din ma in, a kiciamna khat hu in, a lu a tol in meet hi.

¹⁹ Amate in Ephesus khua theng a, tua munah Paul in Priscilla le Aquila nusia hi. Ama in synagogue ah pai a, Jew te taw thu kikum hi.

²⁰ Amate in khuangei zaw a taam lai natu in ama tho uh hi. Ahihang ama a thukim bua hi.

²¹ Taam ngawl zaw in a din tu ciang, “Pathian ii deina ahile no kungah kong pai kik tu hi,” ci hi. Tuabangin ama Ephesus panin teambaw taw ding hi.

²² Caesarea a thet ciangin, Jerusalem ah pai a, pawlpi mite paupui in, tua zawkciang Antioch ah pai hi.

²³ Tua munah hun tawmvei a zak zawkciang ding kik hi. Ama in Galatia le Phrygia ngamte kaantan in pai a, thu um theampo thakhosak hi.

Ephesus le Corinth ah Apollos Haw

²⁴ Tua hun laitakin Alexandria khua ah a suak Apollos kici Jew te pasal khat Ephesus khua ah hong pai hi. Ama in thuson thiam khat hi a, Laithiangtho zongh a khawng a kheakin he hi.

²⁵ Ama sia Topa Lampi a kihil sa khat hi a, tha lawpna lianpi taw Jesus thu thangsak a, maan takin hil hi. Ahitazong ama ii heak sia in John ii tuiphumna bek ahi hi.

²⁶ Jew te ii synagogue ah hangsan takin thuson tu in kipan hi. Priscilla le Aquila in ama thu a zaak uh ciang, amate inn ah ciapui uh a, Pathian Lampi a maan zaw lai in hil thiang uh hi.

²⁷ Tuasia ciang Apollos in Achaia ah pai tu in khensat ahikom, Ephesus ah thu umte in, ama a huna in Achaia ngam a om thu umte laithaksak a, pha takin vai a mua natu in hanthawn uh hi. Ama a thet ciangin, Pathian ii thuthiamna taw thu um a suakte atu in, a huna lian mama hi.

²⁸ Banghang ziam cile, Jesus sia Messiah a hina thu, Laithiangtho sisanh in a lak telna taw in mihonte mai ah, Jew te taw kam kinialnate sungah a mawngnei mama kam nialnate taw Jew te a zo ngawp hi.