Ruth 4 - Syin Chin Bible

Boaz in Ruth Teenpui

¹ Boaz sia a khua kongpi ah pai in tua kikhopna munah to hi. Tua zawkciang Elimelech ii mealheak naihuaibel, Boaz ii son sia pa hong pai hi, Boaz in ama sam in, “Hi sungah hong pai ta'n, ka lawm pa awng, hong to ta'n,” ci hi. Tuasia ciang ama pai in to hi.

² Tua zawkciang Boaz in a khua lampuite sawm zongh samin tua mun ma ah to a sawl hi.

³ Amate a tosak zawkciang a mealheak pa munah, “Tu in Naomi sia Moab panin hong ciakik a, ih beepa Elimelech neisa a lo sia ama in zuak nuam hi,

⁴ tuaciang hi thu na heak uh kul ka sa hi. Na dei le hi sungah a to mite mai ah lei in. Ahi hang na dei buale lei nuam bong ci in, banghang ziam cile lei thei natu thu a nei masabel sia nang hi a, tua zawkciang kei hi pheang khi hi,” ci hi. Tua pa in, “Tuasia lei tu khi hi,” ci hi.

⁵ Boaz in, “Pha mama hi, ahizong Naomi kung panin lo na lei le, Moab meingong nu Ruth zongh a lei suak tu ni hi, tuasia ciang bekin a lo sia mithi pa ii bangkua sungah om tu hi,” ci hi.

⁶ Tua pasal pa in, “Tuabang thu ahile lo lei theina ka thuneina sia thasua tong, banghang ziam cile ka tate in tua lo lua thei ngawl tu uh hi. Nangma lei in, tuasia kei lei bua zaw tong,” ci in zo hi.

⁷ Tua hunlai in, sum kizuak kilei na ahizong, vanh kithena ahizong, kipsak na tu in a zuak pa in peangdap suut in a lei pa tungah a piak sia a ngeina hi. Israel te in hi bangin thukip thukho suaksak hi.

⁸ Tua ahikom pasal pa in Boaz mun ah, “Tuasia nangma lei in,” a ci ciang, a peangdap suutin Boaz pia hi.

⁹ Tuasia ciang Boaz in lampuite le a om dangte mun ah, “No sia tu ni in Elimelech le a tapate Chilion le Mahlon ii neisa theampo Naomi tung pan ka leina tetti hi siat nu hi.

¹⁰ Tua bek dom ngawlin Mahlon zi meingong nu Moab mi Ruth sia keima zi suak hi. Hi sia in mithi pa bangkua sungah a neisa teng kip tu hi, ama ii innkuan khang zongh a mite sung le a khua sungah kizom tan tu hi. No teng sia hi thu huvau in tetti hi siat nu hi,” ci hi.

¹¹ Lampuite le a dangte in, “Hi hi, tetti te hi khu hi. Topa in na zi sia Jacob atu ta tam mama a piangsak Rachel le Leah bang hong hisak tahen. Ephrath bee le ngui sungah hau in Bethlehem khua sungah na minthang tahen.

¹² Topa ii hi nupi khangmoi tung pan hong piak tu tate sia Judah le Tamar tapa Perez bangkua bang hong hisak tahen,” ci hi.

Boaz le A suan A paalte

¹³ Tua ahikom Boaz in Ruth sia a zi tu in ciapui hi. Topa in Ruth thupha pia a, nau hong paai in, tapa khat hong hing hi.

¹⁴ Numei te in Naomi tung ah, “Topa pok in! Ama in nang hong en kik tu tupa khat tuni hong pia hi. Hi patang sia Israel ah minthang tahen!

¹⁵ Na monu in nang hong it hi, tuaciang ama in tapa sali sang zongin nang atu tam hong sepsak zo zaw hi. Tuaciang tu in ama in tupa khat hong pia a, tua pa in nang atu nuntakna thak le na huai ciang ngam muanna hong pia tu hi,” ci uh hi.

¹⁶ Naomi in nau sia la in toai bikbek a, pha takin omh hi.

¹⁷ Innpaam nupi te in tua pano min sia Obed phuak uh hi. Amate in ngual mun theampo ah, “Naomi in tapa khat hong nei hi!,” ci uh hi. Obed sia Jesse ii pa suak a, Jesse sia David ii pa hi.

^18-22 Hiteng sia Perez pan David dong khangsimna ahi hi: Perez, Hezron, Ram, Amminadab, Nahshon, Salmon, Boaz, Obed, Jesse, David ahi hi.