Pusuana 37 - Syin Chin Bible

Thuciamna Thingkuang Vawt

¹ Bezalel in a sau centimetre 110, a zai centimetre 66 le a saang centimetre 66 a pha Thuciamna Thingkuang sia acacia thing taw vawt hi.

² Ama in khamh ciitak taw a sung a pua tuamin, a kiil kiimkot teng khamh taw zial hi.

³ Tua thingkuang puak natu in ama in khamh kual li vawtin, a lang ah kual nii veve khuam peang li tungah bul hi.

⁴ Ama in a puak natu in acacia thingpumte vawt a, khamh taw tuamin,

⁵ kuang pangh ah a kibul a kualte sungah thun hi.

⁶ Ama in a sitna sia a sau centimetre 110, a zai centimetre 66 in khamh ciitak taw vawt hi.

⁷ Ama in sek taw a kiseak khamh taw cherub niite lim vawtin,

⁸ a sitna mong ah khat veu koi hi. Ama in a sitna taw sakhat suak tu in vawt hi.

⁹ Cherub te thingkuang sitna tungah khat le khat kimai ngatin a tha phalh a, kuang sitna liap siat hi.

Pathian A kipia Anluum atu Sabuai Vawtna

¹⁰ Ama in a sauna centimetre 88, a zaina centimetre 44, le a saanna centimetre 66 a pha sabuai sia acacia thing taw vawt hi.

¹¹ Ama in tuasia khamh ciitak taw tuamin, a king kiimkot teng khamh taw zial hi.

¹² A kiimkot millimetre 75 zai a mong tuamna vawt a, khamh taw zuut hi.

¹³ Ama in tua sabuai zawnna tu in khamh kual li vawtin, a peang omna king li teng ah bul hi.

¹⁴ A kualte sabuai zawnna thingpumte thun natu ahikom a mong tuamna taw a kinaina ah koi hi.

¹⁵ A zawnna thingpumte acacia thing hi a, khamh taw tuam hi.

¹⁶ Ama in sabuai atu a vawt khamh taw kivawt kuangte: pakante, haite, haitungte, le bealte sia sapittui taw biakpiakna in zak tu ahi hi.

Meikhuam Vawt

¹⁷ Ama in khamh ciitak taw meikhuam vawt hi. A bul le a khuam sia a kiseak khamh taw vawtin, a zepna paakte, a mom le a paakpalhte zongh a khuam taw kisakhat siat hi.

¹⁸ A pangh pan baak luk zaamsakin, a lang le a lang ah baak thum veve om hi.

¹⁹ Baak luk te khat simin almond paakmom le a paakpalhte taw a kibang a zepna paakte thum tek nei hi.

²⁰ Tua meikhuam in almond paakmom le a paakpalh taw a kibang a zepna paakte li nei hi.

²¹ A baak kop thum sim ii nuai ah a mom khat tek om hi.

²² Paakmomte, a baakte le meikhuam sia a kiseak khamh bekno khat bekma taw a kivawt sakhat ahi hi.

²³ Ama in meikhuam atu in meiinn sali vawtin, khamh ciitak taw taitee le kuangdaite vawt hi.

²⁴ Ama in meikhuam le a vanh teng khamh ciitak kilogramme 35 taw vawt hi.

Ngimnamtui Hal natu Biaknatau Vawt

²⁵ Ama in ngimnamtui hal natu in acacia thing taw biaknatau khat vawt hi. Tua in a dung a vai a kikim hi a, a sauna centimetre 45, a zaina centimetre 45 le a saanna centimetre 90 ahi hi. A kingdok li teng kipee siatin, sakhat suak hi.

²⁶ Ama in a tung, a pangh li teng, le a kingdok teng khamh ciitak taw tuamin, a kiil kiimkot teng khamh taw zial hi.

²⁷ Ama in a zawnna thingpumte thun natu in khamh kual nii vawt a, a pangh nii ii kiil nuai ah bul hi.

²⁸ Ama in acacia thingpumte vawtin, khamh taw tuam hi.

Noi Sathau le Ngimnamtui Vawt

²⁹ Ama in paaknamtui bangin a kihel a thiangtho noi sathau le ngimnamtui ciitak zongh vawt hi.