Pusuana 33 - Syin Chin Bible

Topa in Sinai Mual Nusia tu in Israel Thu pia

¹ Topa in Moses tungah, “Nangma le Egypt pan na pusuapui mite in hi mun nusia in, Abraham, Isaac, Jacob le a suan a paalte tungah piak tu a, ka kamciamna munah pai tavun.

² Vantunglalang khat note lam hong lak tu in kong puak tu a, Canaan te, Amor te, Hit te, Periz te, Hiv te le Jebus te ka notkeak tu hi.

³ Note ngampha le ngamnuam ah pai tu nu hi. Ahizong kei note taw kong pai buatu hi, banghang ziam cile mihing thinpuite na hi uh a, lampi ah kong mon tha tu hi,” ci hi.

⁴ Hi thu mite in a zaak uh ciang amate khuangai in, suangmanpha kizepna te bun nawn ngawl uh hi.

⁵ Amate tungah Moses ii a son natu in Topa in, “Note sia mihing thinpuite hi nu hi. Note taw tawmveino sung ih kithawl bek zong kong mon tha tu hi. Tu in na suangmanpha kizepnate suut vun, tuaciang note tungah ka sep tu sia ka khensat tu hi,” ci in a thupiak hang hi.

⁶ Tua ahikom, Sinai Mual a nusiat zawkciang, Israel mite in suangmanpha kizepnate bun nawn ngawl uh hi.

Topa ii Ompuina Puanbuk

⁷ Israel mihingte ii ngiaphual a saat simin Moses in a Puanbuk thiangtho la in ngiaphual pan a khuala thithim na munah koi hi. Tua in Topa ii ompuina Puanbuk kici a, Topa thu a dongh nuamte in tua munah pai uh hi.

⁸ Tualai ah Moses a pai simin, mipite a Puanbuk kongbiang ah ding tek a, Moses a sungtan dong en uh hi.

⁹ A sungah Moses a tum zawkciang, meeikhuam tuaksuk in Puanbuk kongbiang ah tawlnga a, Topa in meei sung pan Moses paupui hi.

¹⁰ Mipite in Puanbuk kongbiang ah meeikhuam a mu po ciang kun uh hi.

¹¹ Ngualtamh khat thuson tu bang keakin maitang kisi a Topa in Moses paupui hi. Tuaciang Moses ngiaphual ah heak kik hi. Ahizong Nun ii tapa, ama a hu, tangvalpa Joshua sia Puanbuk sungah om lai hi.

A Mite Ompui tu in Topa in Kamciam

¹² Moses in Topa tungah, “Tua ngam ah hi mihingte lampui tu in nong sawlna thu thumaan ahi hi, ahizong kei taw a paikhawm tu sia nong son bua hi. Nangma in kei, nong telthiang a, dik kong sa hi nong ci zo hi.

¹³ Tu in tuabang na hile, na tupnate hong son ta'n, tua hile nangma na seamin, kong lungkimsak tawntung tu hi. Hi minam nangma atu in na tealsa a hina thu zongh phawk in,” ci hi.

¹⁴ Topa in, “Nang taw ka paikhawm tu a, zawna kong pia tu hi,” ci hi.

¹⁵ Moses in, “Kote taw nong paikhawm bua ahile, hi mun hong nusiasak heak in.

¹⁶ Kote nong tonpui bua ahile, keima le na mite tungah na lungkimna thu akua in bangbangin hong he tu ziam? Kote nong ompuina in leitung midangte sung pan kote hong kilamdangsak tu hi,” ci in zo kik hi.

¹⁷ Topa in Moses tungah, “Nong nget sa bangin kong seam tu hi, banghang ziam cile nang kong tel sitset a, na tungah ka lungkim hi,” ci hi.

¹⁸ Tuasia ciang Moses in, “Hesuakna taw nong ompuina khuavak taang velvol sia hong musak ta'n,” ci in ngen hi.

¹⁹ Topa in, “Note mai ah, ka phatna teng kong paipui tu a, noma omna ah ka min thiangtho kong thangsak tu hi. Keima in Topa ka hi a, mulkimna le hesuakna ka teal mite tungah ka lak hi.

²⁰ Ka maitang kong musak buatu hi, banghang ziam cile ka maitang a mu peuma, nungta ngawl tu hi.

²¹ Ahizong suang khat tungah na din thei natu in, ka kungah mun khat om hi.

²² Kong ompuina khuavak taang velvol sia in nang hong kaantan ciang, suanghawng sungah nang kong koi tu a, kong kaantan zawk mateng ka khut taw nang kong hum tu hi.

²³ Tua zawkciang ka khut ka dok tu a, ka nung teng na mu tu hi, ahizong ka mai na mu buatu hi,” ci in zo hi.