Pusuana 13 - Syin Chin Bible

Taciil Aapna

¹ Topa in Moses tungah,

² “Tapaciil theampo kei tungah aapna hong nei tavun, banghang ziam cile Israel tapaciil theampo le nganno suakciil apa theampo keima aa ahi hi,” ci hi.

Tol saw ngawl Anluum Poai

³ Moses in a mihingte tungah, “Egypt ngam sal na tanna mun na nusiat ni — tuni phawk tavun. Tu ni sia Topa in ama ii vaangletna taw hong pusua pui ni ahi hi. Tol saw ngawl anluum ne tu nu hi.

⁴ Tha masabel Abib tha, tu ni in note Egypt nusia nu hi.

⁵ Topa in na taanghpupite tungah Canaan mite, Hit mite, Amor mite, Hiv mite, le Jebus mite teenna ngam piak tu in ciliap huai takin hong kamciam hi. Tua ngam leihoi leiphana ngam ah hong paipui ciang kum sim tha masabel sungin hi poai vawt nanak tu nu hi.

⁶ Ni sali sung tol saw ngawl anluum na ne tu uh a, ni sali ni in Topa tungah upatna poai na vawt tu uh hi.

⁷ Ni sali sung tol kisaw anluum peuma na ne buatu uh a, tol ahizong tol kisaw anluum peuma na ngam sungah a om buatu hi.

⁸ Tua poai na vawt uh ciang na tapate tungah Topa in Egypt pan note hong paipui ahi hu in hi bangin poai kivawt hi, ci in son tu nu hi.

⁹ Hi ngeina poai vawtna in na khut ah ahibuale na tal tungah na khat a kikhit bangin, tua in Topa thukham hong phawksak tawntung tu hi. Tua in Topa thukham na sin tu le na sim tawntung natu in hong phawksak tu hi. Banghang ziam cile Topa in a vaangletna taw Egypt pan note hong pusuapui hi.

¹⁰ Kum sim a ciangtan hun a tun simin poai vawt tu nu hi.

Taciil

¹¹ “Topa in na taanghpupite tungah a kamciamsa Canaan ngam ah note hong paipui tu hi. Tua ngam note tungah hong piak ciang,

¹² tapaciil theampo Topa tungah pia nanak tu nu hi. Na ngannote a pa suakciil theampo Topa neisa hi a,

¹³ ahizong ama tung pan laa pa a suakciil theampo sia tua taang in tuuno khat piakna taw tan kik tu nu hi. Tua laa na tan kik nuam bua ahile a ngawng thiaktan in. Na tapaciil peuma tan kik tu nu hi.

¹⁴ Mailam sangah na tapa in hi bang a ih sepnate bang a khiakna ziam ci in hong dongh le, ‘Topa in a vaangletna zanghin ih saltanna Egypt pan eite hong paipui hang ahi hi.

¹⁵ Egypt kumpipa a thinsakin eite hong paisak nop ngawl ciang Topa in Egypt ngamsung tapaciil theampo le nganhing suakciil a pa theampo thatlum siat hi. Tua ahi hu in tapaciil le nganhing suakciil a pa theampo Topa tungah sangaw biakna in kipia a, ahizong ih tapaciilte sia kitan kik hi.

¹⁶ Hi bang ngeina poai vawtna sia nung thu hong phawksak kik tu in ih khut tungah ahibuale ih tal tungah tepteena a kikhit bang hi tu hi; tua in Egypt pan Topa in a vaangletna taw hong pusuapuina thu hong phawksak tu hi,’ ci in son tu nu hi,” ci hi.

Meei Khuam le Mei Khuam

¹⁷ Egypt kumpipa in Israel te a paisak lai in, Philistia tuipi hui ah a paito lampi sia lam banbel hikale, Pathian in totpui ngawl hi. Pathian in, “Amate ngal a sim kul tu ci in a mu ciang a thin kikheal a, Egypt ah a heak kik tu ka oai bua hi,” ci in ngaisun hi.

¹⁸ Tua lampi taangin ama in sennealngam kiimkot a, San Tuipi sangah masuan hi. Israel te in ngalsim natu ngalhiamte pua uh hi.

¹⁹ Joseph in Israel te tungah a sep tu in ciliap huai kamciam a vawtsak bangin, Moses in Joseph ii luang tonpui hi. Joseph in, “Pathian in note hong suatak ciang, hi mun pan ka luang nong pua hamtang tu uh hi,” ci hi.

²⁰ Sukkoth nusia in Israel te dingin, sennealngam mong Etham ah ngiaphual saat uh hi.

²¹ Amate sun ahizong, zan ahizong a khualhaw thei natu in sun hunin lam a lak tu meeikaai khuam khat taw, zan hunin khuavak a pia tu in meitaang khuam khat taw amate mai ah Topa pai hi.

²² Israel te mai ah sun hunin meeikaai khuam le zan hunin meitaang khuam om tawntung hi.