Psalm Late 97 - Syin Chin Bible

A lianbel Ukpa Pathian

¹ Topa sia kumpipa hi! Leitung awng lungdam in! Tuipi sungah a om, no tuikulhte awng, lawp tek vun!

² Meeikaai le khuazing in ama kiim uum hi; ama in thutang le thukhaikim taw uk hi.

³ Meikuang sia a mai ah pai a, a kiimkot ah a om a ngalte kaanghtum hi.

⁴ Ama ii khualeng in simlei taangsak hi; tuasia leitung in mu in liing hi.

⁵ Mualte sia Topa ii mai, leitung theampo ii Topa mai ah khuainun bangin tui tham hi.

⁶ Vantungte in ama thutang thangsak uh a, minam theampo in ama ii minthanna mu uh hi.

⁷ Milim a bia peuma maizum kingasak tu hi; pathian theampo in Topa mai ah kun uh hi.

⁸ Zion mite lungdam uh a, Judah khuapite lawp tek uh hi, banghang ziam cile na thukhenna hang ahi hi, Topa awng.

⁹ Vaanglianbelpa Topa awng, nang sia leitung theampo a ukpa na hi hi; pathian dangte theampo sangin na lianzaw lai hi.

¹⁰ Topa in siatna a ensante it hi; ama in ama mite ii nuntakna dal hi; mihing seksolte ii thahatna panin amate suatak hi.

¹¹ Thutangte tungah khuavak taang a, miphate tungah lungdamna om hi.

¹² No a thutang theampo awng, Topa ii a sep sate hu in lungdam vun! A thiangtho Pathian in bang teng seam zo ci sia phawk vun a, ama tungah lungdamko vun.