Psalm Late 95 - Syin Chin Bible

Pokna La khat

¹ Hong pai tavun, Topa pok tek tawng! Ei hong dal Pathian tungah ih lungdamna hangin lasa tek tawng!

² Ama mai ah lungdamkona taw pai in, a lungdamhuai pokna late sa tawng.

³ Banghang ziam cile Topa in a vaanglian Pathian hi a, pathian dang theampo tungsia ah a vaanglian kumpipa ahi hi.

⁴ Ama in lianghawng thuk belte panin mualsaang belte dong leitung buppi uk hi.

⁵ Ama in a vawtsa tuipi uk hi; ama mama ii a piansak leitung zongh uk hi.

⁶ Hong pai tavun, kunin ama bia tek tawng; eite hong Vawtpa, Topa mai ah khupdin tek tawng!

⁷ Ama in eite Pathian ahi hi; eite sia ama hong khoi mite ih hi a, ama ii hong vaak tuuhonte ih hi hi. Tuni in ama son teng ngai vun:

⁸ “Na taanghpupite ii Meribah ngam Massah sennealngam sungah a om lai bangin na thinpuisak heak vun.

⁹ Tua munah amate atu ka vawt theampo sia amate in mu napi amate in kei hong sit in hong phin zazaan hi.

¹⁰ Kum sawmli sitset tua mite tungah ka lung a kim bua hi. ‘Amate in bangza in thumaanna sel ziam! Amate in ka thupiakte a zui nuam bua uh hi’ ka ci hi.

¹¹ Ka thin uuk a, a ciliap huai kiciamna ka vawt hi: ‘Muang takin na tawlngak natu a kong khapsa ngam sungah na tum ngei buatu uh hi’ ka ci hi,” ci hi.