Psalm Late 9 - Syin Chin Bible

A Thutang khenna hangin Pathian tung Lungdamkona

¹ Topa awng, ka thin theampo taw nang kong pok tu hi; a lamdang na nasepnate ka son tu hi.

² Nangma hangin lungdamna taw la ka sa tu uh hi. Vaanglianbel Pathian awng, na min pokna la ka sa tu hi.

³ Nang nong kilaak ciangin ka ngalte nungkin kik a amate lutu in thi uh hi.

⁴ Nangma thumaan thutang taw thu na khen a, kei sangah nong pang hi.

⁵ Pathian he ngawlte na puavawk zo a, mihing seksolte na lalthamsak zo hi; amate kiphawk kik nawn ngawl tu hi.

⁶ Ngalte sia a tawntungin bo siat zo hi, a khuapite na lalthamsak zo a, amate kimangil cip zo hi.

⁷ Ahihang Topa sia a tawntungin kumpi hi a, ama in a thukhenna kumpi tokhum phut zo hi.

⁸ Ama in thutang taw leitung uk a; ama in minamte thukhaikim taw thukhen hi.

⁹ Zawthawk a thuakte atu in Topa sia bukna kip ahi hi, ngimna hun sungah ngammuanna mun ahi hi.

¹⁰ Topa awng, nang hong hete in nang hong muang tu hi; nang hong zuante na nusia bua hi.

¹¹ Zion pan a uk Topa tungah pokna lasa vun! Ama nasepnate minam theampo tungah son vun!

¹² Pathian in a ngimngate phawk a, a kaana aw a mangil bua hi; tuaciang amate tungah a khialte daan pia hi.

¹³ Kei hong hesuak ta'n, Topa awng! ka ngalte tung pan ka thuaknate hong en ta'n! thina pan hong suatak ta'n Topa awng,

¹⁴ tua hi le Jerusalem mihingte mai ah ding thei a, nangma kong pokna thute theampo ka son thei tu hi. Nangma in kei nong hut manin ka lungdam tu hi.

¹⁵ Pathian he ngawlte in amate ii taw sa dum sungah taaksuk uh hi, a thaangsiana sungah amate awk zo hi.

¹⁶ Topa in thutang khennate taw ama le ama hong kilaak hi, mihing seksolte sia amate ii a sep a vawtte taw ma in awk hi.

¹⁷ Pathian a nial theampo le a seksol theampo ii lam tawpna sia thina hi.

¹⁸ A cimawte kimangil tawntung ngawl tu hi, a zawngte lametna zongh a tawntungin kisucip ngawl tu hi.

¹⁹ Topa awng, hong pai ta'n, mihingte in nang nalhsak heak in; Pathian he ngawlte na mai ah samin, amate tungah thu khen in.

²⁰ Topa awng, amate lausak in; a thithei te ahi lel hunlam kitelsak in.