Psalm Late 83 - Syin Chin Bible

Israel te ii A ngalte A zaw natu Thungetna

¹ Pathian awng, thim om heak in; huthe ngawlin om heak in, dai takin om heak in!

² En in! Na ngalte in hong langpan a, nang hong ensante in hong langpan nginge uh hi.

³ Amate in na mite langkhat panin thu ngealku uh a, nangma ii na panpui mite thasawm uh hi.

⁴ Amate in, “Hong pai tavun, amate ngam sutham tawng, tua hile Israel te sia a tawntungin kimangil tu hi,” ci uh hi.

⁵ Amate in a ngealna tungah lungkim tek a, nang hong langpan tu kipawlna khat vawt uh hi:

⁶ Tuate sia Edom le Ishmael te; Moab le Hagri te;

⁷ Gebal, Ammon le Amalek mite, Philistia le Tyre mite ahi uh hi.

⁸ Lot ii suan Ammon le Moab ii pawlpui a thahat Assyria te zongh amate sangah pang hi.

⁹ Midian mite le Kishon Ngun a om Sisera le Jabin tungah na vawt bangin amate tungah vawt in.

¹⁰ Endor ah nangma in amate na zothal a, amate luang lei ah a muat uh hi.

^11-12 “Pathian neisa leitang theampo eima atu in la tawng” a ci Oreb le Zeeb tungah na vawt bangin amate lampuite tungah vawt in; Zebah le Zalmunna te na zaw thal bangma in amate a ukte theampo zo thal in.

¹³ Pathian awng, amate sia leivui bangin thezau in a, vui ii seamkeak taangphawte bang hisak in.

¹⁴ Duithuk mei ii a kak bang, mualte a kaanghsak meikuang bangin

¹⁵ na vuipi suangval taw amate del in a, a kiitakhuai na vuipi taw amate lausak in.

¹⁶ Amate maitang sia maizumna taw na tuam in, Topa awng, amate in na vaangletna telsak in.

¹⁷ Amate lelna thuakin a tawntungin lau ngawp tahen a, maimawlna sungah amate thi tahen.

¹⁸ Nangma bekma in Topa na hi hunlam, leitung bup a lianbel ukpa na hi hunlam amate in he tahen.