Psalm Late 76 - Syin Chin Bible

Ngalzopa Pathian

¹ Pathian sia Judah ngam sungah kihe hi; ama min sia Israel ngam sungah ki upat hi.

² Jerusalem ah ama ii inn om hi; Zion Mual tungah teang hi.

³ Tua munah ama in ngalte ii ngalhiam theampo ahi a thaltangte, a lumte le a namsaute sutham hi.

⁴ Pathian awng, na minthang lawlawm hi! Na ngalte na zawna mual pan nong heak kik ciang, na vaanglian lawlawm hi.

⁵ A ngalkap hangte sia a neisa theampo uh kiluak siatin amate in tu in a thite mutna ah a mut laitak hi a, amate hatna le thiamna theampo sia kimanna a nei bua hi.

⁶ Jacob ii Pathian awng, nangma in amate na tawn ciang siphute le a tung tote pukin thi uh hi.

⁷ Ahihang Topa awng, nang sia a kuama theampo in hong kiita hi. Na thin uuk ciang na mai ah kuama ding zo ngawl hi.

⁸ Vantung panin na thukhenna na kitelsak hi; leitung ah a kinengcip theampo hut natu,

⁹ thukhen tu in nong dinto tak ciang, leitung sia lau in thim khipkhep hi.

¹⁰ Mihingte thin uukna in nang atu in pokna tam vaial a pian natu hi bek hi; ngal kidona pan a taang laite in nangma ii poai khaam tan tu uh hi.

¹¹ Ama piak tu in na kamciamte Topa na Pathian ii tungah pia vun; no a nai ah a om minamte theampo awng ama atu letsongte puak vun. Pathian in ama kiita tu in mihingte a vawt hi;

¹² ama in a kiphasak kumpipa tapate kiniamkhiaksak in, kumpi liante sia lausak vadil hi.