Psalm Late 74 - Syin Chin Bible

Minam bup Suatak natu Thungetna

¹ Banghangin hi bangin kote hong nusia ni ziam, Pathian awng? Nangma mite tungah a tawntungin na thin uuksak tu ni ziam?

² Khuangei lai pek a, nangma mama atu na tealsa mihingte phawk in, saltanna sung pan nangma minam tu a, na tat sate phawk in. Khatvei lai a, na teenna mun Zion Mual sia phawk in.

³ Hi a laltham sate munah pai in; ih ngalte in Biakinn sungah na theampo lalsak zo hi.

⁴ Na ngalte in na Biakinn sungah zawna mualsuana taw au zo uh hi; amate in tua munah zawna lim in laandial khai zo hi.

⁵ Amate in hei taw thing a phuk, thingphukte taw kibang hi.

⁶ Amate in a kizeam thingpheak theampo a hei le a sekpuite taw saattham uh hi.

⁷ Amate in nangma ii Biakinn lalsakin mei taw hal uh hi; amate in nang hong kibiakna mun ninsak hi.

⁸ Amate in eite hong sucip nuam hi; ngamsung a thiangthona mun theampo haltum uh hi.

⁹ Koma ii tepteena lim thiangtho theampo bo siat zo hi; kamsaangte kuama taang nawn ngawl a, hisia bang tanvei khuangei tu ziam ci in kuama in he ngawl hi.

¹⁰ Pathian awng, bang tanvei, ih ngalte in nang hong nuisan tu ziam? Na min a tawntungin hong selno tu ziam?

¹¹ Banghangin kote nong hu tu sia nial ni ziam? banghangin na khutte na nungsangah seal ni ziam?

¹² Ahihang Pathian awng, nang sia a kipat panin koma kumpipa na hi hi; nangma in kote tamvei ma nong hun zo hi.

¹³ Na thahatna lian taw tuipi na khen a, tuipi sung nganhing lianpuite lutang na sutham hi;

¹⁴ Leviathan nganhing lianpui ii lutang na sutham a, a luang sia sennealngam sungah, nganhingte vaakna in na nei hi.

¹⁵ Ciktui le tuisamhte na luangsak a, ngun liante na kangsak hi.

¹⁶ Nangma in sun le zan na bitphua a, ni le tha a omna tek ah na koi hi;

¹⁷ nangma in leitung ii mong na omsak hi; khuakhaal le phalbi hun na vawt hi.

¹⁸ Ahihang Topa awng, na ngalte ii nang hong nuisat uh sia ciamtee in, pathian sel amate in nang hong zawngsak uh hi.

¹⁹ A cimaw na mite a ngilo a ngalte khut sungah nusia heak in; a kivawtsia, na mite mangil heak in!

²⁰ Kote taw na vawt thuciamna sia ciamtee in. Ngam kingsong a zingna mun theampo ah zawthawk buaina om hi.

²¹ A kinengcip mihingte maizumsak heak in; tua mizawng le mi cimawte in hong pok tahen.

²² Pathian awng, nangma thu in hong kithawn ta'n a, na thu khosak in! Sunkhuateak in pathian sel mihingte in nang hong nuisan zazan ahi hunlam ciamtee in.

²³ Na ngalte ii thin uuk auna le nang hong langpante ii a tawntung ngamlumna na mangil heak in.