Psalm Late 68 - Syin Chin Bible

Zawna Minam La

¹ Pathian hong dingto a, a ngalte kithethaangsak hi. Ama a ensante in lelna taw taikeak uh hi.

² Meikhu a kiseamkeak bangin amate hawlkeak hi; khuainunte meikuang mai ah a tuithap bangin, mihing seksolte Pathian mai ah a mangthang uh hi.

³ Ahihang thutangte in ama ii omna ah lungdam in lawp uh hi; amate lungdam in, lawpna taw au uh hi.

⁴ Pathian tungah lasa vun, ama min pokna lasa vun; meei tungah a to pa atu in lampi sial khol vun. Ama min sia Topa hi a, ama ii mai ah lungdam vun!

⁵ Ama ii Biakinnpi thiangtho sungah a teang Pathian in tangate khoi a, meingongte sungsia hi.

⁶ Ama in pawl nei ngawl, a ngamkhingte ii teen natu inn khat pia a, thongtaakte lungdam suatakna sungah lampui hi; ahihang a leedote ngam tawnghtolna munah teang tu uh hi.

⁷ Pathian awng, na mihingte lam na pui hun, sennealngam kaantan in mai na nawk pui ciangin,

⁸ Sinai Pathian ahi Israel te ii Pathian hong paina hangin, lei kiliing a, van in nguatui buaksuk hi.

⁹ Nangma in ngua na zusak piikpeak a, a tul sa na leitang na puuapha kik hi;

¹⁰ na mite in tua munah a inn sa uh hi; na phatna taw mizawngte kisap teng na sik hi.

¹¹ Topa in thupia a, numeite tam mama in tua thu son uh hi:

¹² “Kumpipate le a ngalkap honte taikeak hi!” ci uh hi. Inn ngak nupite in ngalte neisa a kiman teng hawm uh hi:

¹³ a thakhui khamh cipha taw a tee vakil, ngunn taw a kituam vakhu limte zongh kihel hi. (Banghangin ngal kido ni in note pawlkhat tuu khawk sungah om nu ziam?)

¹⁴ Vaanglianbelpa Pathian in kumpipate Zalmon Mual tungah a thethaang ciang tua munah ama in vuuk taaksak hi.

¹⁵ Bashan mual sia mualdawn tam mama a nei mual khat hi a, bangza in a nasia mual ahi ziam!

¹⁶ Banghangin a nasia na mualdawn saangte panin Pathian ii a ten natu a teal mualtung sia zawnsakna taw en ni ziam? Topa sia tua munah a tawntungin teang tu hi!

¹⁷ A thahat siphu ngalleang tul tampite taw Topa in Sinai panin a thiangtho mun zuan hi.

¹⁸ Ama in a saangna munte ah kaato a, a ngalmat sa tam mama tonpui hi; ama in a leedo mite tung panin letsong saang hi. Tua munah Topa Pathian teang tu hi.

¹⁹ Ni khat zawkciang ni khat ih vanhngit hong puaksak Topa pok vun; ama in eite hong hunkhia Pathian ahi hi.

²⁰ Eite Pathian sia hong hunkhia Pathian ahi hi; ama in Topa, eite Topa hi a, thina panin eite hong suatak hi.

²¹ A mawna a kheal nuam ngawl, a ngalte ii lutang sia Pathian in sutham takpi tu hi.

²² Topa in, “Na ngalte Bashan panin kong paipui kik tu hi; tuipi thukna panin amate ka lato kik tu hi,

²³ tua hile amate chisan sung siikin na tan thei tu uh a, na uite in a du zaza liak thei tu uh hi,” ci hi.

²⁴ Pathian awng, zawna mualsuana taw ka kumpipa, ka Pathian ii a biakinn thiangtho sung a zotna sia a kuama po in mu tek hi.

²⁵ La sate masa a, music thiamte nungkhak in, a lai ah numeite in daalkual khuangnote tumin pai uh hi.

²⁶ “A mite kikhopna sungah Pathian pok vun; No Jacob suan theampo awng, Topa pok tek vun!” ci uh hi.

²⁷ A masa phitin unau sungah a nobel ahi Benjamin suante hong pai a, a zom in Judah suan lampuite le amate pawlte, a nung panin Zebulun le Nephtali suante ii lampuite in zui uh hi.

^28-29 Pathian awng, kumpipate ii nang letsong hong piakna Jerusalem na Biakinnpi pan, ko atu na zak, na vaangletnate hong lak ta'n.

³⁰ Pumpa sungah a om ngamsa ahi, Egypt te teih in; khuinote taw a omkhawm khuital hon ahi, minamte theampo na mai ah kunin a ngunn nei uhte nang hong piak mateng in, teih in. Ngal a kin mihingte thethaang in.

³¹ Egypt ngam panin tongciin uliante hong pai tu hi; Ethiopia mite in Pathian tungah a khutte laamto in thungen tu uh hi.

³² Leitung kumpi ngamte awng, Pathian tungah lasa vun, Topa pokna lasa vun.

³³ Taanghlai a, a om van, tua van ah a to pa pok vun. Ama ii a vaanglian awpui ngai vun.

³⁴ Pathian ii vaangletna thangsak vun; A uk theina vaang sia Israel te tungah om a, ama thahatna sia van ah om hi.

³⁵ Israel te ii Pathian a thiangtho inn pan hong pai ciangin bangza in kiitakhuai ziam! Ama in thahatna le vaangletna a mite tungah pia hi. Pathian pok vun!