Psalm Late 63 - Syin Chin Bible

Pathian Thangaina

¹ Pathian awng, nangma in ka Pathian na hi a, nangma kong thangai hi. Ka nuntakna buppi in nang hong dei hi; tui om ngawl, munko, lei tulsate in tui a du bangin ka thaa in nang hong du hi.

² Inn thiangtho sungah nang hong musak ta'n; nang sia bangza in minthang a thahat cisia hong musak ta'n.

³ Nong itna kip sia nuntakna sangin phazaw hi, tua ahikom nang kong pok tu hi.

⁴ Ka nuntak lai teng lungdam kong ko tu hi; ka khutte laamto in thu kong ngen tu hi.

⁵ Ka thaa in kibuailamna an ne in lungkim tu a, pokna lungdamna late nang kong sak tu hi.

⁶ Lupna tungah ka lup ciangin nang kong phawk a, zankhuateakin nang kong ngaisun hi;

⁷ banghang ziam cile nangma in a tawntungin kei hong hu pa na hi hi. Na thakhui ii limh nuai ah lungdam in la ka sa hi.

⁸ Nangma kong luai a, na khut in hong keamcing hi.

⁹ Kei hong thatlum nuamte mithi khua zuansuk tu uh hi.

¹⁰ Ngal kisimna sungah amate kithatlum tu a, ngiapuite in a luangte ne tu uh hi.

¹¹ Pathian in ama zawna pia ahikom, kumpipa a lungdam tu hi. Pathian min taw kamciam a piate in ama pok tu a, ahihang leilot theite kam kihuksak tu hi.