Psalm Late 62 - Syin Chin Bible

Pathian Sungsiatna sung Kimuanna

¹ Kei hong hun tu in Pathian thinsau takin ka ngak hi; Ama bekma ka suang hi.

² Ama bekma in kei hong sungsia a, hong hun hi; ama sia kei hong hungpa hi a, hong kizo thal ngei buatu hi.

³ Dal a puk sa sia sangin a kho ngawl zaw mihing khat sia note theampo in bang tanvei sisim lai tu nu ziam?

⁴ Ama vaang a kipiakna dinmun panin a khiasuk nuam bek hi thong nu hi; note in leilot thusonna sungah nuam na sa uh hi. Thupha piakna kammalte na zak uh hang, na thinsung uh ah ama na haamsiat uh hi.

⁵ Keima in Pathian bek ka suang hi; ama ii sungah ka lametna ka koi hi.

⁶ Ama bekma in kei hong sungsia a, hong hun hi; ama sia kei hong hungpa hi a, hong kizo thal ngei buatu hi.

⁷ Kei hong kingupna le hong ki upatna sia Pathian tung pan bek hi; ama in a thahat kei hong sungsia pa ahi hi; ama in ka belhna ahi hi.

⁸ Hun theampo sungah Pathian muang vun, ka mite awng. Na ngimna theampo ama ko vun, banghang ziam cile ama sia ih bukna hi.

⁹ Mihingte sia, husan khat bang bek hi siat hi; a lian a no a kibangin man nei ngawl hi. Khaikhin tungah koi leang bangma ngit ngawl hi; tuate sia husan khat sangin zaangzaw lai hi.

¹⁰ Ngoltolna sungah thin muang heak vun; sutolna taw meetna bangma nga tu in ki um heak vun; na haunate a khangto hial zongin tuate suang heak vun.

¹¹ Pathian in vaangletna sia ama aa hi a, ama ii itna sia kip hi ci in a son tamvei ma ka za hi.

¹² Topa awng, nangma tatak ma in mihing sim atu, a sep babangin thaman na pia hi.