Psalm Late 59 - Syin Chin Bible

Hong Kepcing natu Thungetna

¹ Ka Pathian awng, ka ngalte khut sung panin hong hun ta'n; kei hong simte kung panin hong dal ta'n!

² Tua mihing ngilote kung panin hong hun ta'n; tua mihing thatte kung pan hong suatak ta'n!

³ En in! Amate in kei that tu in hong pang hi; mihing tatsiate ka lang ah hong kikhawmtua uh hi. Amate ii tuabang a, manlang tak a kei hong sim natu mun a zot uh sia, mawna khat po hang ahibuale ka tatkhialna khat po hang,

⁴ tua ahibuale keima ii kicin laakna khat po hang zongh hi ngawl hi, Topa awng.

⁵ Tho in, Topa Vaanglianbelpa Pathian awng, kei hong hu tu in hong kuan ta'n; Israel te ii Pathian awng, nangma ma in en in! Khanglo in, Pathian he ngawlte daan pia in; a ngilo ngual leeheak theite tungah hesuakna lak heak in!

⁶ Amate in nitak sangin hong heak kik a, ui bangin ngual ngalh a, khuapi sungah vak kawkoai uh hi.

⁷ Amate ii hong selnonate le hong tawnnate ngai in. Amate ii kam sungah om a leei sia namsau taw kibang ahitazong, kuama in amate pau za ngawl tu in um uh hi.

⁸ Ahihang Topa awng, nangma in amate na nuisan a, Pathian he ngawl theampo na selno hi.

⁹ Na thahatna kong muang hi; nang sia ka bukna na hi hi, Pathian awng.

¹⁰ Ka Pathian in kei hong it a, kei kungah hong pai tu hi; ama in ka ngalte ii ngallelna kei hong musak tu hi.

¹¹ Amate thatlum heak in, Pathian awng, tuabang hi thong le te ka mite in mangil tha thei tu hi. Topa, kote hong dal pa awng, Na thahatna taw amate thethaang in a, zo cip in.

¹² Mawna sia amate muk ah om hi; amate kammal theampo mawna vive ahi hi; a kiphatsakna sungah amate awkvalh tahen! Amate in longsia le leilot thu zangh ahikom,

¹³ na thin uukna taw amate susia in; susia cimit in. Tuasia ciang a kuama po in Pathian in Israel te a uk hunlam he tu a, a ukna sia leitung bup ah kithung ahi hunlam tel tu hi.

¹⁴ Ka ngalte in nitak sangin hong heak kik in, ui bangin ngual ngalh a, khuapi sungah vak kawkoai uh hi,

¹⁵ an zongin a vak uite taw kibang a, an a kicingin mu buale mau uh hi.

¹⁶ Ahihang na thahatna thu, la in ka sa tu hi; na itna kip sia zing simin a ngingin, la in ka sa tu hi. Nang sia ka bukna na hi zo a, ngimna sungah ka belhna na hi hi.

¹⁷ Kei hong hungpa awng, nangma kong pok tu hi. Ka bukna sia Pathian hi a, kei hong it Pathian ahi hi.