Psalm Late 58 - Syin Chin Bible

Mihing Seksolte Daan Piak tu Thungetna

¹ No ngamukte in a maan khensatna na pia ngei uh ziam? Mihing khat sim ii tungah thutang in thu na khen uh ziam?

² Khen ngawl nu hi! a sia na vawt thei tu uh teng bekma na ngaisun uh a, tuaciang ngam le lei ah ngoltol khialna liante vawt nu hi.

³ Mihing ngilote in a khan tawntung ngamtatna maan ngawl taw nungta uh hi; a pian ni pan kipan leilot thuson uh hi.

⁴ Amate sia ngulte bangin nguu taw kidim hi; amate in ngulsok nangong bangin a bil uh huh hi,

⁵ tuate in ngul zol thiamte aw le za ngawl, mitbum thiamte phuisamna le za ngawl uh hi.

⁶ Pathian awng, hi a kiitakhuai tawpite ii hate thiaktan in.

⁷ Lei sungah tui tum bangin amate mang vadi tahen; lampi lai lopate bangin kisiikcil tahen.

⁸ Amate sia buan ii khulup toktolte bang hi tahen; khuavak a mu ngeingawl a thisa a suak nausen khat bang hi tahen.

⁹ Amate in zongh tel man ngawlin lopa bangin kivaattan hi; a lauhuai thin uukna taw Pathian in amate a nuntak lai ma in muutkeak tu hi.

¹⁰ Mawneite daan a kipiak a mu uh ciang thutangte lungdam tu hi; amate in a seksolte ii chisan sung siikin tan tu uh hi.

¹¹ Mihingte in “Thutangte sia thaman kipia takpi hi; Leitung ah thu a khen Pathian khat om takpi hi,” a ci tu uh hi.