Psalm Late 50 - Syin Chin Bible

Biakpiakna Tatak

¹ Vaanglianbel Pathian ahi Topa hong pau hi; ama in leitung bup nisuana le nitumna kilaklaw ah a om theampo khawm hi.

² A hoina taw a kicing Zion khuapi panin Pathian vaang hong taang hi.

³ Eite Pathian hong pai a, ahihang a thimtham in hong pai bua hi; ama mai ah a lengkeak meikuang om a, vuipi suangval in a kiim uum hi.

⁴ Ama in a mite tungah thu a khen ciangin a tetti tu in van le lei sam hi.

⁵ Ama in, “Sangaw biakpiakna nei in, kei taw thuciamna a vawt, a thumaan ka mihingte kei kungah hong khawmtua tavun” ci hi.

⁶ Vantungte in Pathian sia thutang a, ama in thukhenpa ma hi ci in thangsak hi.

⁷ “Ka mite awng, na ngai vun, hong son tu khi hi; Israel te awng, note langpanna tetti pang tu khi hi. Kei sia Pathian ka hi a, note Pathian ka hi hi.

⁸ Na sangaw biakpiaknate hu le nong piak tawntung uh meihal biakpiaknate hu in kong mawsak bua hi.

⁹ Na lo sung pan na khuitalte ahizong, na nganhon sung pan kealte ahizong ka kitaangsamh bua hi;

¹⁰ duisung nganhing theampo le mual tul tam mamate tungah nganhonte sia keima aa ahi hi.

¹¹ Ngamsung vacimte theampo le nuntakna a nei theampo zongh keima neisa ahi hi.

¹² “Ka ngil a kial le nang tungah an kong ngen buatu hi, banghang ziam cile leitung le a sungah om na theampo sia keima neisa ahi hi.

¹³ Khuitalte ii sa ne in, ahibuale kealte ii chi dawn na khi ziam?

¹⁴ Pathian tungah lungdamkona sia nangma sangaw biakpiakna hi zaw tahen, Vaanglianbelpa tungah piak tu a, na kamciam bangin pia siat in.

¹⁵ Ngimna hong pai ciangin keima hong ko tavun; Noma kong hun tu a kei nong pok tu uh hi.”

¹⁶ Ahihang Pathian in mi seksolte munah, “Banghangin ka thupiakte lotnga nu ziam? Banghangin ka thuciam sia thu sonin nei tu nu ziam?

¹⁷ No kong puuaphat tu nong oai bua uh a, ka thupiakte na nial uh hi.

¹⁸ Nguta na mu theampo ii lawm na hi uh a palngul mawneite taw na kipawl uh hi.

¹⁹ Ngitlona thuson tu in a tawntungin a kinging sa in na om uh hi; Leilot thute na son tu na haisaang ngei bua uh hi.

²⁰ Na suapuite uh mawsiat tu in na kinging uh a, a khial natu na zong uh hi.

²¹ Hite theampo na sep uh hangin, bangma kong ci bua hi, tuasia ciang kei sia noma taw a kibangin nong tuat uh hi. Ahihang tu in kong mawsak a, a thu kong telthiangsak hi.

²² “No, kei hong ngaingonte awng, hi thu ngai vun, tua ahibuale kong susia tu hi, tuaciang no hong hun tu kuama a om buatu hi.

²³ Lungdamkona sia kei vaang hong pia sangaw biakpiakna hi a, kei thu hong nite theampo ka hun takpi tu hi” ci hi.