Psalm Late 48 - Syin Chin Bible

Pathian Khuapi Zion

¹ Topa sia lian a, ih Pathian khuapi sung le a mual thiangtho tungah nasia takin pok tu ahi hi.

² Zion, Pathian mual sia, saangin hoi hi; kumpilianpa khuapi in leitung theampo lungdamna hong puak hi.

³ Pathian in a khuapi kulhte sungah ngammuanna om hi ci in lak hi.

⁴ Kumpite kikhawmtua in Zion Mual sim tu in hong kuan uh hi.

⁵ Ahihang tuasia a mu uh ciangin lamdang sa hi; amate lau in taikeak uh hi.

⁶ Tua munah amate sia launa le thinngimna taw nausuak tu a tun numei khat bang hi a,

⁷ lauhuai vuipi suangval sungah a kilok teambawte taw kibang hi.

⁸ Pathian vawt sa le sep sate ih zaaksa hi a, tu in Vaanglianbel Topa ih Pathian khuapi sungah tuate ih mu zo hi; ama in tua khuapi sia a tawntungin keamcing tu hi.

⁹ Pathian awng, na Biakinnpi sungah, nong itna kip ka ngaisun uh hi.

¹⁰ Mun theampo ah nang hong kipok a, leitung theampo ah na minthanna kizel hi. Thutang khenna taw nangma in na uk hi;

¹¹ Zion mihingte lungdam tahen! Nangma in a maan thukhennate na pia hi; Judah khuapite sungah lungdamna om tahen!

¹² Pathian mite awng, Zion kiimkot ah pai vun a, ngalvilna tausaangte a phakza sim vun;

¹³ khang kikte tungah na son thei natu in luphungte le kulhpite ciamtee in, veal vun a, hi bangin ci vun:

¹⁴ “Hi Pathian in a tawntung a tawntung atu eite Pathian ahi hi; hong pai lai tu hunte theampo sungah ama in eite lam hong pui tu hi.”