Psalm Late 46 - Syin Chin Bible

Pathian Ei taw Omkhawm

¹ Pathian in ih belhna le ih thahatna hi a, ngimna hun sungah hong hun tu in a kinging sa in om tawntung hi.

² Tua ahikom leitung keak a ngawk ngawp a mualte tuipi thuk sungah a kisep hial zong;

³ tuipite hawkin kilok a, mualte liing ngawp le zong ih lau buatu hi.

⁴ A Saangbel Pa ii inn thiangtho, Pathian khuapi a lungdamsak ngun khat a om hi.

⁵ Pathian in tua khuapi sungah om a, tua khuapi a lal ngei buatu hi; zing khuavak tuungin a hu tu in ama hong pai tu hi.

⁶ Minamte lau uh a, kumpi ngam liinglawng hi. Pathian aw ngingin, tuaciang leitung tuitham hi.

⁷ Topa, Vaanglianbelpa in ei taw omkhawm hi; Jacob ii Pathian sia ih bukna ahi hi.

⁸ Pathian ii sep sa le vawt sate en tu in hong pai tavun; leitung ah a vawt na lamdangte en in.

⁹ Ama in leitung theampo ah ngal kidonate thimsak hi; ama in thalkawngte thiaktan a, teite susia in, lumte haltham hi.

¹⁰ “Kisim kidona tawp vun a, Pathian ka hina hong tel tavun, minamte ii sungah a lianbel le leitung ii tungsia ah a lianbel ka hi hi” ci hi.

¹¹ Vaanglianbelpa Topa in ei taw hong omkhawm hi. Jacob ii Pathian sia ih bukna ahi hi.