Psalm Late 42 - Syin Chin Bible

LAIBU A NIINA Psalm Late 42 — 72 Ngamdang ah Saltaang khat ii Thungetna

¹ Pathian awng, sangai in luitui vot vakil a thangai bangin, nang kong thangai hi.

² Nang a nungta Pathian sia tui du bangin kong thangai hi; bang hun ciang nang omna munah hong pai in hong bia thei tu khi ziam?

³ “Na Pathian koi sungah om na ziam?” ci in ka ngalte ii hong dok hunsung bup, sun taw zan taw kapin ka thitui bek an in ka nei hi.

⁴ A bosa hun sungah lasakna le auna taw Pathian a pok a lungdam mihing hon khat keima in lampui in Pathian inn ah ka paina uh ka ngaisut ciangin ka thin tamhtham hi.

⁵ Banghangin tuaza in khuangai khi ziam? Banghangin tuaza in ngim nga khi ziam? Pathian sungah ka lametna ka koi tu a, ka hunpa le ka Pathian khatvei ma ka pok kik tu hi.

^6-7 Hi sung ka saltanna ah ka thin tamhtham ahikom, ka ngaisutna te nang sangah kong heak a, khuangaina tuihualte ka thaa sungah ama in hong puak hi; lungmanna te in namthuam bangin keima hong hawk a, Hermon mual le Mizar mual tung pan Jordan ngun dong tuiteau nging bang ahi hi.

⁸ Ka nuntakna ahi Pathian tungah zanin la khat ka sak thei natu le thungetna khat ka nei thei natu in Topa in sun lai in a itna kip hong lak tahen.

⁹ Kei hong hungpa Pathian tungah, “Banghangin hong mangil zo ni ziam? Ka ngalte tatsiatna banghangin thuak tan lai tu khi ziam?” ka ci hi.

¹⁰ “Na Pathian sia koisungah om ziam?” ci in amate ii hong dawdok ciangin amate ii hong selnonate in kei hong supeak hi.

¹¹ Banghangin tuaza in khuangai khi ziam? Banghangin tuaza in ngim nga khi ziam? Ka lametna Pathian tungah ka koi tu a, ka hunpa le ka Pathian khatvei ka pok kik tu hi.