Psalm Late 38 - Syin Chin Bible

Ngim Thuakpa khat ii Thungetna

¹ Topa awng, na thin uukna taw daan hong pia heak in!

² Na thaltangte taw nong liamsak zo a, nong vaatvawk zo hi.

³ Na thin uuk hu in nasia takin natna ka thuak hi; ka mawnate hu in ka pumpi bup natna ka vei hi.

⁴ Ka mawna namthuam sungah tui ka ta zo hi; tuate kei puak tu in ngit leih hi.

⁵ Ka mawmawt hu in ka meimate uih in muat hi.

⁶ Keima bawngcip in, hong kisupeak zo a, sunkhuateak in ka tau hi.

⁷ Ka ci sa mama a, sukin, ka thi dektak hi.

⁸ Keima sia zawm dikdek in nasia tak hong kisupeak zo hi. Ka thinngim a, na sa in ka tau hi.

⁹ Topa awng, nangma in ka thangai teng na he a, ka tauna theampo nong za hi.

¹⁰ Ka lungpeal ngam vasauh in ka tha bo vangeu a, ka mit zongh ciim vaset meal ngawl hi.

¹¹ Ka meimate hangin ka lawmte le ka innpaamte in hong neak ngawl tu hi; ka innkuanpuite ngawngawn zongh ka kung pan kiheam uh hi.

¹² Kei hong thatlum nuamte in thaang hong sia a; hong liamsua nuamte in susia tu in hong tawng hi; amate in kei hong thasawmna a tawp ngei bua uh hi.

¹³ Kei sia nangong khat bangin khua ka za thei bua a, a ngoai khat bangin ka pau thei bua hi.

¹⁴ Khua zaak thei ngawl man po ngual paupuina a zo ngawl khat taw ka kibang hi.

¹⁵ Ahihang Topa awng, nang kong muang hi; Topa ka Pathian awng, nangma in kei nong zo kik tu hi.

¹⁶ Ka ngalte sia kei ngim ngana tungah kisathei heak hen a, ka kiamsukna huvau in amate kisuangtaaksak heak in!

¹⁷ Kei, a puk dektak ka hi zo a, tatsat ngawlin na ka sa hi.

¹⁸ Ka mawnate kong pualaak hi; tuate in ka thin hong ngimsak hi.

¹⁹ Ka ngalte sia ciidamin thahat hi; bangma thu om ngawl bulin hong ensan tam mama hi.

²⁰ A pha khat a sia taw a thukte in kei hong langpan hi; banghang ziam cile a pha sep tu ka hanciam hang ahi hi.

²¹ Topa awng, kei hong nusia heakin, ka Pathian awng, a khuala na ah om heak in!

²² Topa kei hong hunpa awng, tu tatak ma in hong hu ta'n!