Psalm Late 35 - Syin Chin Bible

Hu natu Thungetna

¹ Topa awng, kei hong langpante na langpan in; kei hong dote na do in.

² Na lum le na thikpuante zamhin kei hong suatak tu in hong pai ta'n.

³ Kei hong delte sangah na tei le na hei hong vik ta'n a, kei nong hut natu kamciam hong pia ta'n.

⁴ Kei hong tha sawmte in lelna le maizumna thuak tahen a, kei hong thasawmte nungkin in lungmang tahen!

⁵ Topa ii vantunglalang in a del ciang amate sia vui ii taangphaw a letkeak bang hi tahen.

⁶ Topa ii vantunglalang in a vaat vawk laitakin amate lampi sia khuazing in leinaal tahen.

⁷ Bangma ahang om ngawl bulin amate in keima thaang hong sia hi, tuaciangin kei hong mat natu in vuum thuk khat to uh hi.

⁸ Ahihang amate ii tel ma in, siatna thuak tu a, amate ii thaang sungah amate awkin lalna sungah taaksuk tu hi.

⁹ Tuasia ciangin keima in Topa hangin ka lungdam tu hi; banghang ziam cile ama in hong hun hi.

¹⁰ Topa tungah “Nang bang ahi kuama om ngawl hi; a hatte khut sung pan a thazawmte na sungsia a, a zawngte sia a zothawte khut sung pan na hung hi” ka thin theampo taw ka ci tu hi.

¹¹ Mi ngilote in kei lang ah tetti in hong ding uh a, ka heak ngawl khialna liante hong suan hi.

¹² Amate in a pha ka vawtte, a sia taw hong thuk a, thin kiamin ka topsuk hi.

¹³ Ahihang amate a ciinat uh ciangin khau-ip puan silhin ka heena taw an ka tang a,

¹⁴ suapui laipee ahibuale ngualtamh khat atu thu ka ngetsak tu bangma in kun in thu ka ngen hi. A nu atu in a tau mihing khat bangin, tau in a kun sa in ka vavak hi.

¹⁵ Ahihang ngim ka nga ciang amate lungdam siat a, hong selno tu in hong kikhawm uh hi; khualmite in hong vel a hong sasaat hi.

¹⁶ Peangzawte nunau tu bangin amate in kei sia etsatna taw hong salh uh hi.

¹⁷ Topa awng, bang tanvei, hong en thong lalai tu ni ziam? Amate ii hong simnate pan hong suatak ta'n a, hi tawpite panin ka nuntakna hong hun ta'n.

¹⁸ Tuasia ciang na mipawlte kikhopna munah lungdam kong ko tu a, amate theampo mai ah nang kong pok tu hi.

¹⁹ Tua a leilot thei ka ngalte sia kei ii lelna hangin na kisatheisak heak in. Bangma ahang om ngawl bul a kei hong ensante in kei ii khuangaina hangin lungdamna taw hong nuisansak heak in.

²⁰ Amate in ngualtamh bangin pau ngawl uh hi; kilemna a dei mihingte taw kisai in, leilot thu a tuatuamte phuak tawm zawsap hi.

²¹ “Nang bang seam cisia hong mu khu hi” ci in amate au in maw hong suan uh hi.

²² Ahihang, Topa awng, nangma in hite sia na mu sa ahi hi. Tua ahikom om thim heak in, Topa; a khuala na ah hong kiheam heak in!

²³ Topa awng, nangma le nangma hong kithawn ta'n a, hong panpui ta'n; ka Pathian awng, hong tho ta'n a, ka thu hong sonsak ta'n.

²⁴ Topa awng, nang sia thutang na hikom kei, maw ngawl hi ci in hong pualaak ta'n; ka ngalte in kei tungah hong kisatheisak heak in.

²⁵ Amate le amate tungah, “Ama taw kipeal thei hing! Ih oai bang keak hi!” cisak heak in!

²⁶ Kei thuakna tungtaang ah a kisatheite lel kha ma in na lelsak in a, lungmang biaibuai tahen; kei sangin pha a kisa zawte maizumna le min siatna in tuam tahen.

²⁷ Maw ngawl hi ci in kei tungah thukhensat natu a mu nuamte in “Topa bangza in lian ziam! Ama in a naseampa ii zawna tungah lungkim hi.” ci in lungdamna taw au kikik tahen.

²⁸ Tuasia ciang na thutang ka thangsak tu a, nitangtumin kong pok tu hi.