Psalm Late 29 - Syin Chin Bible

Vuipi Suangval sungah Topa Awnging

¹ No vantung mite awng; Topa pok vun, Ama ii minthanna le vaangletna pok vun.

² A minthang Topa ii min pok vun a, Thiangtho Pa hong kilangh ciangin a mai ah kunsuk vun.

³ Topa ii awnging sia tuipite tungah kiza hi; a minthang Pathian in vanto bangin nging a, ama awnging tuipi lian tungah hawl hi.

⁴ Topa awnging sia a thahatna le vaang theampo taw kidim hi.

⁵ Topa awnging in cedar kungte taltansak hi, Lebanon mual tungah cedar kungte ngawngawn thiaktan hi.

⁶ Ama in Lebanon mualte sia khuino bangin leang va eetsak a, Hermon mual sia khuital moi bangin kinuntawsak hi.

⁷ Topa awnging in khualeng taangkeaksak hi.

⁸ Ama awnging in sennealngam liingsak a, Kadesh sennealngam sia thing zazaan hi.

⁹ Topa aw in oak thingkungte ngawksak a, a teete a kung tung pan thong siat hi, tua laitakin, a Biakinnpi sung a om theampo in “Pathian minthang hen” ci in au uh hi.

¹⁰ Topa in kumpi a hina taw tui thukte a tawntungin uk hi.

¹¹ Topa in a mite thahatna pia a, kilemna thupha zongh pia hi.