Psalm Late 17 - Syin Chin Bible

A maw ngawlpa Thungetna

¹ Hong ngai ta'n, Topa awng, thutang khen natu a kong ngetna hong za ta'n! Hu ngen a kong auna hong ngai ta'n! Thin tak taw thu kong ngetna hong ngai ta'n.

² Nangma in kei sang pangin thu nong khen tu hi, banghang ziam cile nangma in a maan sia na he hi.

³ Ka thinsung hong he ni hi. Zanin kei kungah nong pai hi; nong veal ngiingeei zo a, ka sungah ngitlo nopna nong mu bua hi.

⁴ Ngualdangte bangin kamsia ka pau bua hi; na thupiakna kong ni a ngoltolna lampi ka tawn bua hi.

⁵ Nangma lampi ka zui tawntung a ka pial tha ngei bua hi.

⁶ Nangma tungah thu kong ngen hi, Pathian awng, banghang ziam cile nangma in kong ngetna nong zo hi; tua ahikom kei sang hong nga ta'n a ka kammalte hong ngai ta'n.

⁷ A lamdang na itna hong pualaak ta'n a, hong hun ta'n; nang kungah ka om ciang ngal le sa panin ka ngammuang hi.

⁸ Na mittang mama na kep bangin kei hong keam ta'n a,

⁹ a seksolte ii hong dona panin na thakhui ii limh sungah hong seal ta'n. Thi theina ngalte in kei hong kiim uum a,

¹⁰ amate in mulkimna nei ngawlin kiphatsak kam pau uh hi.

¹¹ Tu in koisang po ka nga zong amate ka kiimkot ah om siat a, hong kuaivawk tu in hong pang hi.

¹² Amate in tawpite bang hi a, hong balneen nuamin hong ngak hi.

¹³ Topa awng, hong pai ta'n! Ka ngalte langpanin a, zothal in! Mihing seksolte kung panin na namsau taw hong hun ta'n;

¹⁴ hi leitung nuntakna sungah a dei uh po a neite khut sung panin hong hun ta'n. Amate atu na khealsia ngimnate taw amate daan pia in; tua daante sia a tate atu zongin kicing lai tahen a, a tate ii tate dong pawlkhat khomsuan lai tahen.

¹⁵ Ahihang kei in nang kong mu tu hi, banghang ziam cile ngamtat khialna ka nei bua hi; tuaciang ka khanlaw ciang nong ompuina in lungnopna taw hong kidimsak tu hi.