Psalm Late 16 - Syin Chin Bible

Kimuanna taw Thungetna

¹ Pathian awng, hong sungsia ta'n; bit takin ka om thei natu nang kong muang hi.

² Topa tungah “Nangma in ka Topa na hi hi; na pha ka nei theampo nangma kung panin hong pai hi,” ka ci hi.

³ Topa ii a thumaan mihingte sia bangza in pha ziam! Amate taw kithol sia ka nopsakbel ahi hi.

⁴ Pathian dang a del mihingte in amate tungah ngimna tam mama tungsak hi. Amate ii sangaw biakpiakna sungah ka kihel buatu a, amate ii pathiante ka bia buatu hi.

⁵ Topa awng, Nangma in ka nei a minpiang a buppi na hi a, tuaciang ka kisap theampo nong pia hi; maisang ka nuntak natu na khut sungah om hi.

⁶ Tel a nong piakte kei atu bangza in lamdang ziam; tuate in bangza in pha ziam!

⁷ Topa ka pok hi, banghang ziam cile ama in hong lampui hi, tuaciang zanIN ka thinsung phawtheina in hong hilkhol hi.

⁸ Topa hong ompuina a tawntungin ka phawk hi; ama in kei taw kinai in hong om hi, bangma in hong liinglawngsak zo ngawl tu hi.

⁹ Tua ahikom kei sia lungdamko nopna le lungdamna taw ka kidim hi, tuaciangin ngammuanna a cing takin nei ka kisa hi,

¹⁰ thina vaangletna panin hong sungsia na hikom thumaan takin nang atu kong seam hi, tua hi a mithi khua ah nong nusia buatu hi.

¹¹ Nangma in nuntakna sung hong then lampi nong lak tu hi; nangma II nong ompuina in lungdamna taw hong kidimsak a, nopsakna a tawntungin hong puak hi.