Psalm Late 146 - Syin Chin Bible

Ngumpa Pathian Pokna

¹ Topa pok vun! Ka thaa awng, Topa pok in!

² Ka nuntak lai teng ama ka pok tu hi; ka khan tawntung ka Pathian tungah la ka sa tu hi.

³ Na muanna uh sia mihing lampuite tungah koi heak vun; mihing kuama in no hong hun thei ngawl hi.

⁴ Amate a thi ciangin leivui ah cia kik uh hi; tua ni in amate ngealna theampo bo hi.

⁵ Jacob ii Pathian sia ama ii hupa in a neipa le Topa sia amate ii Pathian in, a muangte sia mi nuamsate hi a,

⁶ ama sia vantung, leitung le tuipi, tua teng sung a om theampo a Bitphuapa ahi hi. Ama in a kamciamte kholet tawntung hi;

⁷ Zawthawk a thuakte sangah pangin thukhen a, a ngilkialte an pia hi. Topa in thongtaakte suaktasak hi,

⁸ mittawte khua musak hi. Ama in a puk sate phongto hi; a thutang ama mite it hi.

⁹ Ih ngam sungah khualmi hong teangte ama in sungsia hi; ama in meingongte le tangate hu hi, ahihang a seksolte sia siatcip natu munah then hi.

¹⁰ Topa sia a tawntung kumpipa ahi hi. Zion awng, na Pathian sia hun theampo ah maang tu hi. Topa pok vun!