Psalm Late 141 - Syin Chin Bible

Nitak Thungetna

¹ Nang kong sam hi, Topa; tu in hong hu ta'n! Kong sam ciangin hong ngai ta'n.

² Kong thungetna a namtui biakpiakna in hong saang ta'n a, ka khutte kong lapto sia nitak sangaw biakpiakna khat bangin hong saang ta'n.

³ Topa, ka kam ah a cing tu khat, ka muk kongkha ah a cing khat koi in.

⁴ A maan ngawl sep nopna le, mihing tatsiate seksolnate panpui nopna pan hong keam ta'n. Amate ii anneak poai sungah ka kihel ngei buatu hi.

⁵ Mihing pha khat in deisakna taw hong teih in daan zongh hong pia thei hi, ahihang mihing ngilote ii upatna ka saang ngei buatu hi, banghang ziam cile amate ngamtat siatnate langpanin thu ka ngen tawntung hi.

⁶ Amate a ukte sia suangliang tung panin a kilotsuk tak ciang mihingte in ka kammalte sia maan sa tu uh hi.

⁷ A bebek in a ki ektham thing bangin amate ii ngute sia thaan kiil ah kithethaang tu hi.

⁸ Ahihang nang kong muang tawntung hi, Vaanglianpipa ka Topa awng. Nong dalna ka zong hi; Hong thisak heak in!

⁹ Amate ii kei hong siana thaangte panin hong dal ta'n a, thusia vawtte khauthaang panin hong hung ta'n.

¹⁰ Kei bangma tat ngawlin ka pai laitakin, a seksolte sia amate ii thaang sung ma ah awk tahen.