Psalm Late 138 - Syin Chin Bible

Lungdamko Thungetna

¹ Topa awng, ka thin theampo taw lungdam kong ko hi; tua pathiante mai ah nangma pokna la kong sak hi.

² A thiangtho na Biakinnpi sang maingatin, kunin na min kong pok hi, banghang ziam cile itna kip le na thumaanna hang ahi hi, na min le na thupiaknate sia a lianbel in nong lak hang hi.

³ Kong sam ciangin nong zo kik hi, na thahatna taw kei nong thakhosak hi.

⁴ Topa awng, leitung ah kumpi theampo in nang hong pok tu hi, banghang ziam cile na kamciamte amate in za zo uh hi.

⁵ Amate in na sep na vawt sate le na minthanna liante huvau in la hong sak tu hi.

⁶ Nang sia tungsang ah, saang mama na hihang, a kiniamkhiakte na khoi a, a kiphasakte sia nang kung panin a buu thei bua hi.

⁷ Ngimnate in kei hong uumci ciangin nangma in nong keamcing hi. A thin uuk ka ngalte nong dosak a na vaangletna taw kei nong hun hi.

⁸ Na kamciamsa theampo na seam tu hi; Topa awng, na itna kip tawntung hi. Na patsa nasep sia a khuangkhim dongin hong seam ta'n.