Psalm Late 136 - Syin Chin Bible

Lungdamkona La

¹ Topa tungah lungdamko vun, banghang ziam cile ama pha hi; ama ii itna kip tawntung hi.

² Pathiante theampo sung pan a lianbel pa tungah lungdamko vun, ama ii itna kip tawntung hi.

³ To theampo sung pan a thahatbel pa tungah lungdamko vun, ama ii itna kip tawntung hi.

⁴ Ama bek in nalamdang lakna liante vawt hi; ama ii itna kip tawntung hi.

⁵ Ama ciimna taw vantungte vawt hi; ama ii itna kip tawntung hi.

⁶ Ama in simlei sia tuithukna tungah sa hi; ama ii itna kip tawntung hi.

⁷ Ama in ni le tha vawt hi; ama ii itna kip tawntung hi.

⁸ Ni in sun hun a uksak hi; ama ii itna kip tawntung hi;

⁹ tha le aksi te in zan hun uksak hi; ama ii itna kip tawntung hi.

¹⁰ Ama in Egypt te ii tapaciil teng that hi; ama ii itna kip tawntung hi.

¹¹ Ama in Israel mite Egypt ngam panin pusuapui hi; ama ii itna kip tawntung hi;

¹² a khut tha khona, a vaanglian baan taw pusuapui hi; ama ii itna kip tawntung hi.

¹³ Ama in San Tuipi khen hi; ama ii itna kip tawntung hi.

¹⁴ tuasia kaantan in a mite lampui hi; ama ii itna kip tawntung hi;

¹⁵ ahihang Egypt kumpipa le a ngalkap teng tuitaasak hi; ama ii itna kip tawntung hi.

¹⁶ Ama in a mite sennealngam kaantan in lampui hi; ama ii itna kip tawntung hi.

¹⁷ Ama in a thahat kumpite that hi; ama ii itna kip tawntung hi;

¹⁸ Ama in kumpi minthangte thatlum hi; ama ii itna kip tawntung hi.

¹⁹ Amor mite kumpipa, Sihon thatlum hi; ama ii itna kip tawntung hi.

²⁰ tuaciang Bashan kumpipa Og thatlum hi, ama ii itna kip tawntung hi.

²¹ Amate ngam teng a mite piaksak hi; ama ii itna kip tawntung hi.

²² A naseam Israel te tungah tua ngamte pia hi; ama ii itna kip tawntung hi.

²³ Ngal ih lel ciangin ama in hong mangil ngawl hi; ama ii itna kip tawntung hi.

²⁴ Ama in ih ngalte khut sung panin hong suatak hi; ama ii itna kip tawntung hi.

²⁵ Ama in nuntakna nei theampo an pia hi; ama ii itna kip tawntung hi.

²⁶ Vantung a om Pathian tungah lungdamko vun, ama ii itna kip tawntung hi.