Psalm Late 132 - Syin Chin Bible

Biakinnpi Pokna

¹ Topa awng, David le ama ii thuak haksatnate mangil heak in.

² Topa awng, a vaanglian Jacob ii Pathian, nangma tungah hong kamciamna, hong kiciamnate phawk in:

³ “Inn ah ka cia buatu a, lupna ka zuan buatu hi;

⁴ Topa atu mun khat, a vaanglian Jacob ii Pathian teenna tu inn khat, ka piak mateng,

⁵ ka tawlnga buatu a, ka mu buatu hi,” ci hi.

⁶ Bethlehem khua ah Thuciamna Thingkuang huvau ka za uh a, Jearim lote sungah tua thingkuang ka mu uh hi.

⁷ “Topa inn ah pai tawng; a kumpi tokhum mai pan bia tawng” ka ci uh hi.

⁸ Topa awng, na vaangletna lim ahi, na Thuciamna Thingkuang taw na Biakinnpi sungah hong pai ta'n a, hi sungah a tawntungin hong om ta'n.

⁹ Na thiampite in a maan sepnate vawt tawntung tahen; na mihingte in lungdamna taw au tahen!

¹⁰ Na naseampa David tungah kamciamna khat na pia hi; Topa awng, na tealsa kumpipa nial heak in.

¹¹ David tungah ciliap huai takin kamciamna khat na pia hi; tua kamciam sia na dawk kik tu in na piak ahi bua hi; “Na tapate sung panin khat kumpi ka suaksak tu a, ama in nang zawkciang ngam a uk tu hi.

¹² Na tate in ka thuciamna sungah thumaan a, amate tungah ka piak thute a zui le, amate ii tate zongh in a tawntungin kumpi suakin na za hong lua tu hi,” na ci hi.

¹³ Topa in Zion sia teal zo hi; ama teenna tu in vawt nuam hi.

¹⁴ “Hi sia in a tawntungin, ka teen natu mun ahi hi; hi mun in ka uk nopna mun ahi hi.

¹⁵ Zion tungah ama kisap theampo kicing takin ka pia tu hi; a mizawngte an pia in ka lungkimsak tu hi.

¹⁶ A thiampite sia a sepna theampo ah thupha ka pia tu a, ama mihingte in lasa in lungdamna taw a au tu uh hi.

¹⁷ Hi sungah David ii suan khat sia kumpi lian khatin ka siam tu hi; hi sungah ka tealsa kumpipa ukna ka keamcing tu hi.

¹⁸ A ngalte sia maizumna taw ka tuam tu a, ahizong ama ii kumpingam khangto in nuamsa tu hi,” na ci hi.